樓市出更：連天台特色單位賣四千六萬 碧瑤灣做價豪級

樓市起哄，各類物業均湧現新高價，港島大型屋苑之一薄扶林嘅碧瑤灣，最近錄得一宗罕有大額成交，一個連天台特色單位以約4,600萬元賣出，做價已屬豪宅級，呎價逾1.7萬元，係屋苑新指標。

連天台單位供應少，所以搞到做價愈推愈高。中原黃廷傑同劉Sir講，碧瑤灣最近錄得一宗罕有成交，一個面積約2,687方呎連天台單位獲買家承接，呎價去到約17,119元。

罕有放盤 呎價過萬七

由於上述屋苑大面積嘅特色單位供應好少，同類單位只係得幾個，加上普遍業主係用家，所以放盤可謂少之又少，要買心頭好，自然要出個心動價，業主先願意出售。

他又話，近排樓市氣氛繼續向好，西半山一帶2,000萬元或以下嘅豪宅，成交量都唔錯，好似福苑有個2座中層單位，面積約1,500多方呎，最近以2,000萬元賣出，呎價維持約1.3萬元；而高雲臺中層A室及富景花園2座中層E室，近期都分別有買家以1,085萬與1,500萬元購入。

西貢洋房 扣稅仍勁賺

講開樓價係咁升，部分舊年入市嘅業主見有利可圖，亦寧願畀一筆額外印花稅套現。

世紀21奇豐廖振雄話，有個外籍業主舊年以2,068萬元買入西貢相思灣一幢雙號屋，最近趁樓價升咗，以2,680萬元將幢洋房賣出，扣咗額外印花稅之後，帳面仍然賺478萬元，以洋房面積2,100方呎計，呎價已經去到12,762元。

但部分新盤賺幅就比較細，利嘉閣陳少威話，大坑尚巒高層C室，面積349方呎，近期以505萬元售，呎價1.45萬元，原業主揸咗兩年，個單位僅升值6%。