幾經艱辛 說服長輩轉型

會計學出身的黃達堂畢業後，在外界打拚過才返回捷榮打理家族生意，當時董事會上的全是長輩，作為當中年紀最輕的一員，最初要將企業轉型相當困難。他坦言，自己曾捱過一段Rough Time（艱難的時期）。

Q：返屋企打理生意最大難處喺邊？

A：最初將公司模式改變，要Convince（說服）上面，又要Convince下面，第一樣改革就係風險管理，今日無人唔識，但喺一九七八年，無人會諗呢啲概念。像有個老臣子話：「喂，我哋咁多年做生意都係講信用，信我就賒貨畀佢哋」，而我要搬成個風險管理系統入嚟，經過一段幾艱辛嘅時期。做嘢最緊要係成績，當睇到成績佢哋就心悅誠服喇。

Q：咁你依家嘅風險管理系統又係點？

A：將客戶分大中細級，每級的信貸額、信貸時間都唔同。以前自己覺得應該Set（設定）幾多就Set幾多，依家制度化，分類定賒數期，將壞帳明顯減低，今日只有約0.5%。

Q：除咗風險管理外，仲推行咗咩改革？

A：第二樣係銷售團隊改革，以前每個銷售員都去搵大客，豬頭骨無人啃。之後佢哋要行小組，分港、九、新界，每區分小組，銷售員要交番舊時啲戶口入組，將所得利益交出嚟再分過。行區域制集中對客時間多咗，生意會好。

Q：你點樣將公司企業化？

A：我講得好清楚，全部嘢行政策，所有政策同系統，Peter Wong（黃達堂）都要遵守，如果我都要守，邊個唔使？