魚缸Blogger：華晨醞釀雙底反彈
QE3預期降溫，加上適逢尋日期指結算，大戶轉倉下，魚缸失守牛熊分界線，相信今晚聽埋伯老嘅偉論之後，下個禮拜好淡友應該會正式埋牙開戰。
績優股繼續跑贏大市，尋日品題嘅恒安國際（01044）逆市微升，今日不妨（目及）實盈利繼續有高增長嘅華晨汽車（01114）。受惠寶馬喺祖國大賣，華晨今年上半年純利按年急升42%，至13.32億人仔，而管理層對全年賣出15萬部寶馬嘅目標相當有信心，更預告明年內地豪華車市場將有超過兩成增長，集團應可受惠。
睇番幅圖，華晨尋日大裂口高開後企穩20日線樓上，且醞釀營造雙底反彈嘅走勢，今趟若抽穿7.68元，下站直指8蚊。
華晨汽車（01114）
阻力位：8元
支持位：7元