牛熊對壘：博大市續跌吼63990

心諗本地地產股都有兩日炒吓，點知上任個幾月一直歎慢板的政府突然出招，港股昨日跌235點，一口氣失守埋50日及100日線，技術走勢肯定係唔多好睇，但恒指低開見19,657點，最低挫至19,509點，全日波幅百幾點，主板成交424億元，始終是淡靜中難突圍，向下的機會不是沒有，只是又未到十拿九穩的地步，都係嗰句：「短線出擊，轉身要快」。

大戶終於借消息質地產股，乘機殺埋大批牛證，昨日37隻牛證被劏，當中29隻是恒指牛，估計牛證重貨區下移至19,400至19,499點。續有內地銀行股公布業績，成績唔係差，但內銀股照樣被洗，建行（00939）跌幅顯著，挫2.4%，是昨日成交最大的股票，相關窩輪成交按日增48%至3.5億元。另一隻重磅內銀工行（01398）則排成交榜的第二位，相關窩輪就未見異動。

輪場成交未見底

缸邊股友個個見到大市都搖頭嘆息，話揸過夜的風險大，即日博亦水位有限兼唔容易，輪場成交愈來愈縮，就算日前佔大市的比例稍為回升，但魚缸根本無水，五十步笑百步的狀況，難怪窩輪發行商個個cut budget，平時最肯使錢做宣傳的都話要睇餸食飯。

其實，環球投資市場唔好得香港幾多，美股今年表現跑贏香港，惟成交一樣跌，A股就成交同表現齊齊跌。月前一度積極籌備開檔，準備加入輪場大軍的中資行，現時都把計劃暫擱高台，至於其他個別傳聞半退出狀態的輪商，繼續唔發新輪，這樣下去，輪場成交可能仲未見底。

近日大市主題是炒股唔炒市，但業績期將過，Jackson Hole又打到來，市況有機會趨向較為波動，只是唔容易捉路，宜即日開倉即日埋單，輸贏有個譜。若今日恒指平水開市，可考慮小注熊證，恒指大和熊（63990）今年十二月二十八日到期，收回點數20,400點，槓桿比率16倍。