股海實戰：航運股未脫冰河期

尋日A股先跌後回穩，券商及保險股成反彈動力來源，市傳國家隊入市維穩，係真唔係就要做事後孔明。但睇A股嘅成交額，似乎大部分股民都坐定定等滬綜指下試兩千點心理關口。

港股方面，喺美國推QE3嘅預期降溫，以及預期特區政府公布樓市新政策下走低，恒指回試19,500點水平支持，技術上剛跌穿50日及250日線，短線若未有似樣反彈，跌勢將會持續。本地地主股尋日率先向下插，信置（00083）跌近半成，恒地（00012）、新地（00016）同長實（00001）跌2至3%。

執筆時傳來政府正式公布樓市新措施，大致上係市傳嘅版本，見到有努力增加短期供應，若能如期落實，應有助樓市降溫。從另一角度睇，政府亮咗底牌，地主股短線仍會波動，但相信喺低息環境維持不變下，磚頭始終有價，所以又唔使對地主股前景過分悲觀。

恒安候回吐上車

繼續講吓業績股。恒安（01044）上半年業績理想，主要受惠原材料價格低企，利好毛利表現，加上增派股息，股東叫好，尋日股價逆市靠穩，收報76.55元，升0.13%。多家大行調高恒安目標價，但考慮到未來一個月市況展望，阿莊建議待回試250日線72元水平承接，再睇位上車都未遲。

尋日幾隻航運股宣布業績，招商局國際（00144）上半年純利17.56億元，同比跌55%；撇除非經常收益之純利為16.09億元，跌幅32%；中國遠洋（01919）上半年蝕48.71億元人仔，較去年同期虧損擴大76.7%；中海集運（02866）上半年虧損12.8億元人仔，較去年同期虧損擴大1倍。從呢幾份成績表可見，航運股尚處冰極時期。

事實上，波羅的海乾散貨指數仍然低迷，現處約714點，與今年二月所創嘅歷史新低647點相距不遠。以目前嘅國際貿易形勢，以及航運市場供需仍然失衡嘅情況之下，年底前指數再破底而下可能性唔低，航運股繼續反覆尋底嘅格局未有改變，整個板塊仍身處寒冬，至少喺季內未見到有轉機。第四季中、美政局改變，能否掀起新景象，阿莊唔敢完全否定，但個人睇法不太樂觀，相信最快要等到明年上半年，始有望出現「大地回春」嘅局面！