樓市出更：二線樓超97仲癲

近幾個月，樓價脫韁，升勢想撳都撳唔住，劉Sir尋日睇到一份地產代理嘅報告，喺12個主要二線屋苑之中，有10個平均呎價已超越九七年七月時水平，其中3個升幅仲超過三成，相比10大藍籌屋苑，最好嗰個鰂魚涌太古城都只係升22.2%，明顯二線跑贏一線。

最近樓價屢創新高，二線屋苑升勢亦都相當凌厲，中原黃良昇話，根據12個主要二線屋苑八月份買賣合約登記嘅平均呎價計算，有10個屋苑呎價已經升穿九七年七月時水平，升幅最高係紅磡黃埔新邨，依家平均呎價去到6,892元，比九七年七月升咗39.4%；而第二位係鰂魚涌南豐新邨，期內平均呎價升35.7%至8,414元；沙田中心就升咗32.6%，去到7,482元，排第三位。

太古城15年僅升22%

而表現最差係深井浪翠園，屋苑九七年七月平均呎價7,774元，過去十幾年雖然經歷多次升浪，但依家平均呎價仍然只得4,726元，同高位差幅高約39.2%，將軍澳新都城平均呎價6,212元，就仲差5.2%，以依家樓市走勢，相信唔使幾耐就可以升穿高位。

至於同期10大藍籌屋苑，表現相對二線屋苑就明顯冇咁好，當中只係得7個屋苑呎價升穿九七年，最好嘅太古城期內都只係升咗22.2%，依家平均呎價10,162元，而第二、三位嘅沙田第一城同荔枝角美孚新邨，就升咗16.6與13.9%。

回顧以往嘅數據，樓價自○三年步出谷底，其後輾轉向上升，期內升幅最顯著嘅二線屋苑係黃埔新邨，約九年累升3.1倍，而牛頭角淘大花園同南豐新邨，都升咗3倍及2.9倍，而明顯低水嘅浪翠園同新都城，就只係升咗1.8及1.9倍。

浪翠大落後 吸引追價

喺全城搶盤情況下，樓價大落後嘅浪翠園自然成為追捧對象，美聯余英傑話，該盤今個月已經錄到十幾宗成交，其中有個3座低層A室，面積約784方呎，三房套房間隔，望海景，業主見市況向好，臨場反價5萬元，但買家仍願意追價約325萬元購入，呎價約4,145元。