魚缸Blogger：恒安國際攻守兼備
相信股友們睇緊報紙嘅時候，已經知道美股對當地GDP數字同褐皮書內容公布後嘅反應，而今朝魚缸亦好大機會裂口開出，可惜無論追買定追沽都已失先機，早市都係做住塘邊鶴較為上算。
績優股方面，恒安國際（01044）尋日公布咗一份幾乎無可挑剔嘅中績，期內多賺37.6%至16.26億銀、收入上升10.4%至90.41億銀、毛利率亦增加5.6個百分點至44.2%，美中不足嘅係負債比率升至近七成，但睇番集團手頭現金有成93億銀，而管理層亦表示上月紙巾銷售增長回復理想，喺歐美前景仲未睇得通之下，恒安仍然係攻守兼備。技術上，可候低喺76蚊邊落第一注，阻力睇80蚊。
恒安國際（01044）
阻力位：80元
支持位：74元