股海實戰：新奧淡市發圍

恒指高低波幅不足百點，魚缸缺乏焦點，個股稍為有利好消息即引來狂風浪蝶。好似隻真明麗（01868），上周五已藉旗下公司獲列補貼名單而炒高近一成。尋日上晝再藉公司發通告披露LED業務發展，刺激股價高開見1.1元，由於隻股由一○年高位6.84元跌回落至本月低位0.75元，要沽嘅早沽了，冇沽嘅坐到變化石唔識反應，炒家見踢上去冇咩沽壓，就愈炒愈過癮，下午搶到上全日高位1.95元才見回吐，收報1.78元，升幅83%，成交1.74億元。

其他燈飾股都跟升，達進東方照明（00515）及AV CONCEPT（00595）股價都炒高逾一成，但阿莊自問唔係膽生毛，最怕好似早兩日炒起嘅冷門殼股，炒一、兩日貨仔就停車熄匙冇晒鑊氣，高位接貨隨時偷雞唔成蝕把米！

內房股繼續尋底

尋日人行話下半年會嚴格執行差別化住房信貸政策，國務院又話要嚴防樓價反彈，總之講到明唔會放鬆樓市調控力度。尋日建材同內房股都普遍走軟，恒大（03333）中績顯示負債水平令人擔憂，股價再試3元關承接，水泥股海螺（00914）及中建材（03323）股價走軟，似乎季內內房股尚要繼續尋底。

燃氣股似現風起雲湧，尋日見隻新奧能源（02688）淡市發力，衝穿30元關，高位見31.25元，收報30.7元，創即市及收市新高。據講新奧將於下周四就收購中燃（00384）發通告交代進度及審批情況，另大行摩通最近發表報告唱好新奧，指其上半年銷量增長理想，足見其執行能力，相信可實現全年銷售目標，故予「增持」評級，目標價由33.6元上調至36元。

講到中燃，阿莊早前都講過，喺舊高層回朝下，新奧與中石化（00386）嘅提購未必成功，但亦有聞中石化並未有放棄購併，並擬將目標轉移至新奧，係真唔係就真係班國企老總先至知道。只係單純靠秤，新奧中績有交代，次季以來股價一直受提購中燃嘅不明朗因素影響，嚟緊只要確定結果，哪怕成事與否，都可為股價去除雲霧。走勢上，短期確認企穩30元嘅話，可小注追入，以預測市盈率18至20倍計，可見32至35元，支持位可參考50日線28.5元。