樓市出更：中環舖租沖起

下月深圳有一批「生力軍」一簽多行嚟港，為本港零售市場帶來曙光，咁啱又有個美國時裝品牌喺中環畢打街開幕，附近地舖業主即以進取態度開價預租。聽講中環皇后大道中有個連鎖餅店租緊嘅地舖，業主啱啱叫租每月150萬元，同依家租金比，調升逾2.7倍，呎租達1,000元，係同區一線地舖水平。

有代理同劉Sir講，喺A&F附近嘅皇后大道中雙號地下3號舖，面積約1,500方呎，連鎖餅店依家月租差唔多40萬元，租期幾個月後到期，業主最新意向月租約150萬元，即係每日單係舖租成本都要約5萬元，生意可謂百上加斤。

而喺嗰條街附近一間由鞋店租用多年嘅兩個舖，業主依家每個舖最新意向月租都要約100萬元，新舊租金升幅差唔多1.5同2.3倍。美聯工商舖（00459）行政總裁黃漢成認為，新一批「北水」將來港，對本港一線抑或二線民生區消費市場都好。

海防道舖閃電賣3.6億

有商戶收到風，早前已經搵業主簽訂新租，聽講中環歌賦街一個雙號舖畀連鎖時裝睇中，好快以每月約24萬元預租咗，比新租金增約1倍；另外租客已搬走一段時間嘅皇后大道中62號地庫、地下及閣樓，依家有兩組商戶傾緊租，業主暫時意向月租約160萬元，比舊租調升約78%。

另外，市場剛錄大手舖位成交，第一太平戴維斯袁志光爆料，中港商人劉軍委託唔夠二十四小時放售嘅尖沙咀海防道35至37號地下C舖，以3.63億元售，呎價約48.4萬元，係嗰條街新高，英皇國際（00163）執行董事張炳強表示，集團購入該舖作收租用途。

旺角物業兩月袋1400萬

旺角一線街舖亦熱鬧起來，有代理話，西洋菜南街有個吉咗約半年嘅雙號地舖，啱啱有商戶每月約40萬元租咗，呎租500元，比舊租升3倍。舖租旺都帶挈炒賣，聽講旺角砵蘭街有幢單號物業剛以5,900萬元摸出，投資者兩個月帳面袋1,400萬元，賺幅超過31%。

另外，碧街單號地下部分兩日前成交，投資者即以1,250萬元摸出，速袋150萬元。而張姓投資者亦以2,550萬元買入荃灣大河道單號地舖。