魚缸Blogger：四環業績令人期待
缸邊友尋日繼續望天打卦，靜候伯老禮拜五嘅佳音，主板成交得番360億銀，而今日亦要等到夜晚先有花旗國嘅GDP數據，相信今日魚缸都係悶局居多。
尋日大路股升得靚仔嘅唔多，可以睇得上眼嘅，或者可考慮吓隻四環醫藥（00460）。四環將會喺聽日公布中績，尋日湧上可能係投機客炒定業績。事實上，貴為內地最大嘅心腦血管藥供應商，四環舊年純利按年大升57.8%，至8.24億人仔，而且直至執筆時，集團都無發出盈利預警，加上近年新收購嘅藥物「歐迪美」銷售成績彪炳，其中報自然令人期待，配合股價尋日一棍大陽燭抽上，維持一浪高於一浪嘅走勢，若今轉衝穿密集區阻力3.47元，後市應該有景。
四環醫藥（00460）
阻力位：3.7元
支持位：3.0元