股海實戰：長城汽車睇位入貨

內地經濟不景氣，八月份IPO零上會，連官媒都發文批評A股改革未達效。正當魚缸人氣低迷，股指反覆走低，內地正式啟動轉融通試點，轉融資先行，據講此舉可為魚缸帶來逾千億元人仔新資金，長遠而言亦可改變A股只可炒單邊市嘅限制。阿莊手持嘅券商股海通證券（06837）尋日跌穿9元，可惜成交並未有大增，想加注可以再等一等。

港股方面，恒指低開75點後偏軟，午後喺滬綜指回升下轉跌為升，收報19,811點，升13點，成交僅361億元，扣埋輪證成交，七除八扣後，魚缸嘅淡靜情況同沙士時候真係不遑多讓！

股價今年累升六成

早前廣州限車令，令汽車股發軟蹄，但長城汽車（02333）今年以來股價累升達六成，跑贏同業及大市。睇睇長城份中績，半年賺23.54億元人仔，同比增長29.9%；總銷量26.2萬輛，同比增20%，成績理想。近年公司一直聚焦SUV、轎車、皮卡車三大產品類別，並積極引入節能、環保嘅經濟型車型，受惠中央推出節能汽車補貼政策，其中新推出嘅小型SUV哈弗M4備受市場歡迎。

除咗產品取勝之外，公司成功開拓出口市場，亦係致勝之道。上半年其內銷數量同比增長15%，反而出口銷量則上升45.8%。長遠而言，出口市場大有可為，亦有助紓緩內地車市增長放緩嘅經營壓力。上半年毛利率保持穩定，同比微升0.18個百分點，至26.31%，庫存水平與去年同期相若，管理層有信心實現全年銷售55萬輛車嘅目標。現價計一二年預測市盈率只係高單位數字，論估值仍然係進可攻退可守。

早前旗下產品被澳洲相關部門提出安全警告，但據講不屬於一定要回收嘅範疇，公司亦未有回收相關產品，料事件影響有限。股價走勢方面，今年以來多次跌穿50日線後不久即見回穩，若短期股價再次見阻於18元關，可待回吐出現，喺15元水平再睇位上車，年度業績公布前目標挑戰20元大關，重要支持喺14元。