樓市出更：兩幅爭足三十口 梅窩農地激搶

香港地少人多，居住需求有增無減，近年就連離島地皮，都成為市場搶奪嘅目標，好似早前有30家財團爭購嘅坪洲東灣住宅，就搶到每呎1,627元，係區內未見；尋日亦有大嶼山梅窩兩幅農地，出奇地被搶高超過1倍拍賣沽出，成交價分別達51.1萬及55.1萬元，呎價逾300元。

位於梅窩橫塘嘅兩幅農地，鄰近銀鑛灣酒店及沙灘，尋日透過忠誠拍賣行售出，始終近年離島區地產發展絕不比市區遜色，劉Sir都有興趣去睇吓。

兩幅地面積分別約1,475及1,608方呎，開價22.1萬同24.1萬元，但地皮契約唔多齊，且唔保證有否被人佔用，但競投反應出奇咁熱烈，兩幅地先後獲30及32口承價，最終分別由兩名買家以51.1萬及55.1萬元投得，每方呎地價約346及343元。

屯門無契工廈搶貴47%

拍賣行鄭世傑同劉Sir講，對拍賣成績非常滿意，成交價比估價（即開價）高出逾倍，兩農地距離碼頭大約十五至二十分鐘步程，而周邊亦建有多幢村屋，每幢市價依家都要600萬元，估計購入後可改變發展用途，有可能係原居民或相關人士買入。

離島地皮愈來愈搶手，好似坪洲東灣A地盤，早前亦以1,500萬元賣出，每呎樓面地價高達1,627元。

另一方面，屯門恒威工業中心A座低層15室無契盤，尋日承法院令同場推出拍賣，並獲資深投資者陳應佳（佳叔）及伍冠流等人出價爭奪，佳叔在拍賣前同劉Sir講，呢件貨無契，開價幾平，所以有興趣買嚟收租，最後佳叔以107萬元奪得，比開價高出約47%，呎價約1,381元。

而佳叔兩年前以約600萬元買入嘅深水埗昌華街一地舖，佢話最近連約以933萬元沽，帳面賺約333萬元。

旺角商場舖123萬摸出

此外，旺角好景商業中心1樓雙號舖，尋日透過環亞拍賣行以123萬元摸出，獲搶高約26%，實用面積呎價約3.23萬元。下周有多個法院令物業拍賣，包括北角丹拿花園第2座低層H室，估計開價約620萬元。