Fundman睇市：珠寶鐘錶股落鑊

尋日滬綜指跌36點，報2,055點，創三年半新低。A股積弱，即使強如神華（01088）及兗煤（01171），上周五中期成績好過分析員估計九條街，一樣未能幸免，尋日一開高，即見基金爭先恐後出貨。

昨日港股主板成交縮到四百億都冇，飯局中幾個賓架都話，多間歐、美資行，都準備好晒大信封，過埋八月就會陸續裁員。今年債市旺到極，部分外資行有債券交易補貼都叫救命，更遑論單靠香港魚缸低微佣金收入撐住的小證券行。

僧多粥少搵食艱難

唔知看官有冇同感，在下認為股票行同手機網絡服務一樣，減價容易加價難，尤其平佣經紀通通無人招呼，客仔要自己用手機或電腦落盤，用X用Y或者Z股票行，分別查實唔係咁大，電訊公司都仲算係獨市生意，來來去去嗰幾間，香港C組經紀雖未至於多過米舖，嚴格嚟講得438間，但每日分得四百億成交裏面的9%左右，即大概每間82萬一日，仲要幾蚊佣，你話減價戰唔算飲鴆止渴，筆者真係搵唔到第二個更貼切的形容詞。

建行不敵地心吸力

港股尋日收市跌81點，報19,798點，A股恍似無底深潭，國企指數唔多唔少受牽連，收市跌130點，報9,544點。平保（02318）中期業績唔單止衰，新業務價值開始由高增長轉入倒退期，尋日股價跌2.6%，連埋國壽（02628）跌3.5%，兩隻股票佔國指跌幅三分之一。比較意外嘅係，建行（00939）上半年業績增長14.5%，勝過大行預期接近5%，但都無辦法抵抗地心吸力，高開低收報5.22元，基金及普羅股民悲觀情緒，已蓋過事實，主宰着大市。

深圳再放寬來港個人遊門檻，昨日莎莎（00178）、六福（00590）及英皇鐘錶（00887）都維持升勢直到收市。最近珠寶股炒落後，首選可睇六福，至於昨日倒跌收市的周生生（00116），周四將會出成績表，由於近日業績期係唔係都隊一餐，不妨等埋業績曝光至考慮都未遲。