樓市出更：上水舊樓有寶

响內地個人遊旅客帶動下，上水區零售商舖租務或買賣都搶手；做開舊樓收購嘅培新集團，早排喺港鐵上水站對面龍琛路收咗一排舊樓，仲改咗個名叫上水匯，傳短期會推出市場預租，市場估計部分以天橋連接港鐵站等樓層呎租，可達200元，等同區內龍頭商場上水廣場。

劉Sir八到，上水匯有15層高，仲有2層地庫，總樓面達16萬方呎，係近二十年上水區罕見嘅大型商業項目，呢幢樓暫時起到5樓，正準備進行工程搭條橋連接上水廣場同港鐵上水站，吸引人流過埋嚟龍琛路呢邊，帶旺埋呢邊舊區。

上水匯搭天橋引人流

劉Sir仲知道，上水匯呢個商場有約莫13,000方呎，而樓上可以做餐飲零售嘅樓面就有9,000幾方呎，剩番嘅樓面，應該會留番做寫字樓，事關上水區咁近大陸，始終對寫字樓有需求。

事實上，呢幢樓咁近港鐵站，所以聽講都好多人路過見到招牌，都打去問發展商租務事宜，而睇番隔籬上水廣場天橋通道層嘅商舖，租金都要成200幾元1呎，所以市場估計培新集團都應該會開咁上下價。

區內商場加租可達30%

其實，與上水匯一街之隔嘅上水廣場，場主新地（00016）舊年年尾就講過，呢個商場零售租金由每呎約莫150元去到420元，而早排新簽嘅租約呎租就超過260元，不過，佢哋上季話過，商場整體租金佔其營業額不足10%，所以相信未來有30%加租空間。

新豐路舖回報料十厘

至於科達集團主席湯君明有意打造成「石湖墟不夜天」嘅同區新豐路項目，之前佢就預計呢幢全新7層高銀座式商場，地舖意向租金要成150元1呎，而樓上舖就30元左右1呎。

如果以項目總樓面兩萬方呎計算，因為依家建築成本貴咗，所以總投資額漲到接近1億元，如果項目每月租金收入有110萬到120萬元，租金回報率應該有成10厘。