股海實戰：波司登博財息兼收

美國聯儲局會議紀錄顯示，成員大比數支持推刺激經濟措施，令市場憧憬本周日Jackson Hole伯老真係會報佳音﹗港股日升日跌，前日殺落，尋日卻借外圍利好消息反彈，恒指重上兩萬點樓上，高位見20,133點。

中銀香港（02388）有買盤掃上，股價創五十二周新高24.95元，收市後公布嘅中績略勝預期，可以小注一試。至於二、三線，尋日一批靜咗好耐嘅電訊設備股炒起，若然想刀仔鋸大樹，可密切留意剛以溢價配股、並宣布新投資項目嘅新環保能源（03989）。

憧憬政策催谷消費

若然美國真係推QE3，唔排除內地亦會有動作配合。近日市場盛傳多個部委正聯手制訂政策催谷消費，消費品股亦見有資金流入。事實上，雖然人行遲遲未有降準，但一路進行逆回購增加市場流動性。另外，多個地方政府推出「十二五」投資計劃，估計過去兩個月已公布嘅投資涉及總額已達到7萬億元人仔，比○八年嘅4萬億人仔還要多。

除此之外，要刺激經濟，不外乎係聚焦十三億人口嘅內需市場。睇實內需股，波司登（03998）近年積極推動產品多元化，截至今年三月底止年度，非羽絨服佔總收入比例已增至16%，整體毛利率升3.1個百分點，至50%，純利按年增12.6%至14.36億人仔，成績可予肯定。另外，公司喺倫敦西區嘅旗艦店已於上月倫敦奧運開幕前一天開業，成功進軍歐洲市場。翻查資料，公司喺舊年六月以2,005萬英鎊買入該物業，作為旗艦店及歐洲總部。過去一年倫敦物業價格上升，相信呢項投資亦升值不少。

波司登旗下四大羽絨服品牌喺內地嘅總市場佔有率達34.5%，暑假即將過去，踏入秋冬季，又將迎來羽絨服銷售旺季。參考走勢，○九年以來，每逢第四季，其股價都有好表現。現價計預測市盈率約十倍，估值亦具吸引力，未來一個月係收集嘅好時機。咁啱該股派發末期息每股0.12元，將於下周四除淨，阿莊擬睇位落第一注，博食埋息。作為參考，1.8至2元乃重要支持，首站阻力喺2.5至2.6元。