樓市出更：般咸道餐廳舖易手舖租有期貨

零售市道暢旺，二線民生區地舖都被炒起，經營多年嘅老舖受到衝擊；好似港島西半山般咸道33號一間由莎厘娜餐廳租用超過三十年嘅單邊地舖，早排以3,920萬元連約賣咗，個舖月租3萬唔到嚴重低水，由於個舖貼鄰明年落成嘅行人扶手電梯，新買家已經叫定新租每月16萬元，比依家高出超過5倍。

事實上，上述般咸道舖位餐廳租戶屬區內知名老牌食肆，間舖鄰近香港大學，多年來都係該校師生聚腳嘅地方，依家租緊個舖係八十年代新租，而早响六十年代最先租用附近嘅舖位，後因收樓而搬到依家個舖。

舊約回報唔夠一厘

香港置業工商舖助理營業董事簡元鎧同劉Sir講，上址面積約1,500方呎左右，新買家啱啱簽訂臨時買賣合約購入，涉資約3,920萬元，呎價約2.6萬多元，以依家月租大約2.6萬元計，租期至一六年，收租回報一厘都冇。

不過，貼鄰起緊嘅行人扶手電梯將會响明年初完工，屆時再加上西港島鐵路線效應，該舖位置食正優勢，所以業主依家好有信心咁叫定新租，每月大約16萬元，呎租大約107元，同依家比多超過5倍。

灣仔道舖加租一倍

有個喺附近住咗好耐嘅鄭小姐同劉Sir講，後生嗰陣莎厘娜餐廳新舊舖都有幫襯，當晒佢係家庭餐廳；佢仲話，若未來舖租大升，擔心餐廳老闆未必肯捱貴租。

另一位梁小姐就話，讀書年代已經係佢哋嘅客仔，附近呢幾年開咗好多新食肆，競爭大好多，邊個畀到租，業主就租畀邊個，如果該餐廳第日真係搬出會好可惜。

上述事件只是舊式食肆面臨貴租嘅冰山一角，聽講喺灣仔道111號開店多年嘅齋舖早前已搬出，舖位面積1,500方呎，之前舊租大約6、7萬元，有代理話，以依家附近同類舖位租值計，新租金最少12至13萬左右，同依家比差唔多高一倍。