股海實戰：中國電力 強勢有理

內地A股似係山雨欲來，標普發表嘅報告話，若然內地失業率急速上升，內地政府或將推出大規模措施刺激經濟。事實上，確實見到不斷有大型外資廠大幅削減內地工廠規模，貿易表現差強人意，亦害了唔少民企關門大吉。中國十三億人口有飯開係政府成功「維穩」嘅關鍵，一旦失業率持續上升，中央應該唔會輕視問題，只係任何大動作，都要等十八大後才有望出台。

呢期唔少醜股反彈，例如家電股國美（00493），以及多隻體育用品股等，但未知大家有冇留意，呢類股反彈動力一次比一次弱，好似隻國美，尋日彈到上0.77元就掉頭，而體育用品股更頻見「彈散」，反映呢類股基本因素尚待改善，跟炒至緊要唔好貪心，勢色唔對就要跳車！

招金重上10元關

上周四阿莊推介嘅招金（01818）走勢對辦，股價由9.25元起步，一連抽穿10日及50日線，尋日更重上10元關，收報10.02元，升4.8%。本來都想湊吓熱鬧炒一轉，但見指數似小圓頂派發，走勢唔多靚仔，加上A股將下試大位支持，想備留啲銀彈等低位加注海通證券（06837），故未有行動。

本來諗住煤炭股有機會突破，點知都係未夠力水，龍頭股神華（01088）喺30元邊浮沉咗成半個月都未見突破。不過，部分早前熱炒嘅電力股走勢轉弱確一如預期，如華能國際（00902），近月反彈仍未能突破5.8元阻力位，技術指標轉弱，唔排除反彈完成後要再試5元關承接。

中國電力（02380）算係例外，近期表現強於同業。本月中旬公司成功配股及發債抽水，之後一直企穩配股價2.1元樓上，表現勝於預期。聽講班芬佬係睇好其火、水發電雙線發展模式，既有利降低傳統火電業務嘅周期性影響，亦可透過發展水電配合國家能源政策發展。展望下半年，煤價低迷，其火電業務貢獻可望持續提升，而通脹預期下降、降息預期增加，都有利降低資金成本。

目前中國電力14日RSI已調整至53，短線只要繼續企穩2.1元樓上，後市毋須過於看淡，特別係目前其市帳率僅0.65倍，乃板塊中最低者，未來估值折讓可收窄。以市帳率0.8倍計，目標價可定喺2.6元，1.8至2元關乃重要支持區，未宜有失。