牛熊對壘：重磅股博反彈 吼14908

歐豬國希臘本周會頻密地外訪債主，外圍觀望氣氛濃，就算A股昨日回升，滬綜指升11點，港股都脫不掉牛牛皮皮的悶局，恒指走勢跟周一相似，一度挫穿二萬點後，再拗腰回升，跌幅收窄至4點咁大把，主板成交增至429億元。

好淡互不相讓之下，牛熊街貨距離拉近，周一的牛證總街貨升至27.8億份，單日增加1.5億份，熊證同日街貨減少了3,810萬份至24.66億份，兩者只差3億份，重貨區域的街貨同樣是14至15億份，對後市的啟示作用不強，亦可理解為散戶對後市睇法模棱兩可。

聯通（00762）的3G上客量佳，股價應聲彈，中移（00941）亦微升0.6%，好多輪民近日都搶攻中移CALL輪，正股是昨日成交最大的股票，相關窩輪成交12.5億元，僅次於恒指輪，只是空軍未鳴金收兵，昨日總沽空44.98億元當中，中移佔去了2.88億元，是沽空最大股票。若然中移股價企得住80元樓上，技術走勢都唔係咁差，CALL輪繼續諗得過，不妨密切留意，因兩個月至六個月中移CALL的平均引伸波幅輕微擴大後，仍只有25%左右，算合理。

內銀窩輪難寄厚望

人行又再逆回購，惟今次向銀行注入流動性，似是水緊關係，又市場中人認為短期調低存款準備金率的機會下降，若然估得啱，一向唔少股民玩的內銀窩輪就唔會有咩睇頭，就算趁業績前後走短線，都唔好抱好大期望。

中海油（00883）業績令市場失望，股價下挫是必然事，但見到低位有支持，收市略回順。其實，中海油受蓬萊油田影響，何時復產未有確定時間表，收購nexen如何，又要繼續等待，相信短期會有一定波幅，相關窩輪人氣急升，成交按日增四倍，進取型股友不妨趁機在15元樓下開Call。海油瑞銀購（14908）今年十一月十二日到期，行使價15.9元，實際槓桿12.9倍，引伸波幅約30%。