股海實戰：昆能耐心等候收成

人行尋日進行合共2,200億人仔逆回購操作，創下單日新高，意味人行短期降RRR機會微。港股缺乏方向，恒指收市僅微跌4點，報20,100點，成交略為回升至432億元。兩地魚缸尋日都有一個共同特點，就係二、三線股交投轉趨活躍，似乎游資見指數跌唔落、升唔起，轉投落後二、三線炒股不炒市！

卜架行生意難做，為免日日對住魚缸磨爛蓆，唔少股友都經已離場，搵番份正職過日神。有卜架行想喺淡市殺出血路，用幾蚊一宗交易佣金做招徠；大銀行亦不甘寂寞，搞五年免佣。阿莊諗唔明，依家魚缸交投淡靜，明知一宗交易收幾蚊佣金要蝕入肉，點解仲有卜架行肯做？資深卜架老林就話，其實呢啲細行志不在新客可以帶來幾多生意額，而係想藉推廣多儲一啲客戶數據，博日後內地券商來港洽購本港同業進軍海外市場，便可善價而沽，原來如此！

業績股成市場焦點，康師傅（00322）再升6%；中國財險（02328）受業績帶動升7%。阿莊組合中持有嘅昆侖能源（00135）亦會喺本周四宣布中期業績，尋日股價異動，升穿13元關，收報13.06元，升4.3%。

燃氣市場地位穩固

今年上半年國際油價波動，也許會對昆能嘅上游業務造成影響，但隨着旗下天然氣管道及銷售、LNG接收站及加工廠業務漸成規模，上游業務佔集團收入比例已降至兩成多，盈利受油價波動影響已下降。至於盈利增長動力，主要來自完成收購中石油北京天然氣管道六成股權，投資建設嘅天然氣輸配管道工程項目亦已有三條投產運營，另內蒙烏銀線管道工程亦會喺今年投產，有望進一步鞏固喺天然氣市場嘅領導地位。

此外，旗下江蘇及大連嘅LNG接收站投產，將提供穩定嘅收入及氣源保障，有利加快LNG加工廠發展，待今、明兩年旗下加工廠陸續投產，料其總生產能力將由去年嘅每日138萬立方米增至每日2,000萬立方米。至於近年公司積極拓展車用及船用LNG市場，更加係大行重點睇好嘅業務。早前瑞銀便曾發報告唱好昆侖嘅車用LNG銷售及管道業務，並將其目標價調高至18.5元。

昆能股價自年初11元水平炒到上四月初高見14.54元後配股集資（配股價13.1元），之後便維持喺12至13元水平上落。阿莊認為，此股既有實力國企股東支持、業務發展配合國策，故會繼續持有，耐心等候收成。若然今次業績對辦，且看能否引發市場重估。