樓市出更：恒生賣樓夠勇嗌貴83%

近排熱錢流入物業市場，銀行亦唔執輸，重新啟動非核心物業放售步伐，恒生銀行（00011）或有關公司四年前曾經推出過招標嘅港島東恒生西灣河大廈全幢，依家再攞出嚟招標，意向價達5.5億元，同嗰陣叫價大幅高出逾83%。

仲量聯行陳柱衡同劉Sir講，位於筲箕灣道171號嘅恒生西灣河大廈全幢，樓上16層係住宅單位，樓下6層係商用，雖然物業部分如地下一個商舖以銀行售後租回方式賣，但區內附近好多舊樓賣出後都重建，新買家或買咗後重新發展。

依家恒生意向價約5.5億元，截標日期係今年十月二十二日。有代理話，現時同區新盤呎價約1.4萬至1.5萬元左右，業主依家叫價都好進取。

上址於一九七六年落成，係一幢22層高商住大廈，地盤面積約6,300方呎，依家總樓面大約6.56萬方呎，以地積比率8倍重建的話，重建後樓面大約5.04萬方呎。

觀塘工廈呎價破7800

劉Sir睇番資料，幢大廈○八年八月招標，當時意向價約3億元。其實恒生銀行或有關公司近幾年賣咗好多幢物業，最經典係○六年中以22.58億元賣出中環恒生大廈全幢（現址為盈置大廈）畀摩根士丹利房地產等財團。

政府話要起動九龍東，區內新建工廈特色單位變得搶手。睇番土地註冊處資料，觀塘鴻圖道35號天星中心31同32樓極高層複式、全海景單位，早前以近7,500萬元一手賣咗，呎價超過7,800元，成為全港工廈呎價新高。

旺角老舖連約售億三

上述特色單位買家係綽衡有限公司，公司註冊處嘅資料顯示，公司董事為陳錦泰，睇真啲間公司註冊地址，同之前斥資共近7.4億元買咗油麻地MK1數碼廣場同佐敦數碼講商場嘅買家順聯集團一樣。

另外，旺角弼街一個由舊式餐廳租用近四十載嘅地舖，畀一個投資者以1.3億連約購入，呎價約10萬元，回報兩厘四。