股海實戰：中升圓底反彈持續

抖暑高峰期，魚缸極之淡靜，恒指喺兩萬點水平上落，大市成交僅380億元。滬綜指尋日一度跌穿2,100點心理關口，創三年新低，最終收報2,106點，跌7.9點。目前滬綜指距離兩千點關僅有5%距離，開始有分析指，滬綜指可能要回歸「1時代」。

中燃（00384）重新聘任前高層劉明輝出任董事總經理，事件中阿莊深深體會到咩叫做「世事無絕對」﹗假設劉氏為首嘅新管理層與北控集團態度一致，相信新奧（02688）同中石化（00386）嘅提購失敗機會甚高。聽表叔講，中石化班老總睇見近期變化，心裏有數，擬將洽購目標轉移至合作夥伴新奧身上。

新車款帶動銷情

又睇番業績股，中升集團（00881）今年上半年收入同比增長48%，至242億元（人民幣．下同）；純利減少27%至3.71億元；每股盈利0.19元。期內新車銷量同比增長50%至90,876輛，業績引述行業分析指，若下半年經濟形勢向好，且冇大規模限車令政策出台，相信全年內地乘用車銷量可逾1,600萬輛。由於公司代理嘅梅賽德斯─奔馳、雷克薩斯、奧迪、東風本田等品牌陸續推出新車款，有望帶動銷售，故對下半年展望審慎樂觀。

今年五月公司收購從事汽車改裝嘅卡爾森汽車技術公司七成股權，另與廣發銀行簽訂銀企戰略合作協議，以加強喺汽車金融服務代理方面嘅業務基礎。

股價方面，尋日成功突破50日線，收報9.56元（港元．下同），逆市升3.8%。假設下半年純利與上半年相若，現價預測市盈率約20倍，已頗大程度反映行業估值下調。走勢上，短線回吐企穩50日線9.2元，可持續圓底反彈趨勢，向六月下旬高位10.64元推進；但若再次失守10日線8.94元，則反彈完成，或須再下試8至8.2元承接。