樓市出更:「大款」賺夠走

本港樓價急升,內地客趁高位出貨。劉Sir參考有關內地業主沽本港豪宅數據,上季樓價1,200萬元以上嘅豪宅買賣,內地個人賣家佔比例按季再升0.9個百分點至8%,比例唔單止連升兩季,仲平咗二○一○年第二季有紀錄以來最高紀錄。其中推出至今升值唔少嘅西南九龍帝峯.皇殿,就錄得8宗內地業主沽貨個案屬最多。

上季豪宅成交,內地個人賣家比例增加,劉Sir覺得唔係因為佢哋唔睇好後市而趕沽貨,部分搵夠賺夠梗係趁高位沽貨離場啦,再加上本地業主最近非常惜售,所以內地業主沽貨比例增加一啲都唔出奇。

帝峯佔8宗出貨最多

中原數據顯示,上季樓價1,200萬元以上豪宅登記,內地個人賣家宗數及總值分別佔8%及10.1%,按季增0.9及2個百分點,涉及金額比例係○七年有紀錄以來首出現「雙位數」。

雖然內地業主沽本港豪宅比例增加係不爭嘅事實,但其實數字實質上都只係「冰山一角」;有關數據顯示,上月已知個人賣家較多嘅豪宅物業,好似上述錄得最多同類個案嘅帝峯.皇殿,其實都係講緊8宗咁大把,涉及金額約9,700萬元。

劉Sir都估到呢個盤會有較多內地客出貨,事關前年推出時已經吸引咗大批內地客入市,到依家屋苑已大幅升值,依家伺機出貨都好合理。至於一向係內地客入市首選嘅九龍站屋苑,其中上季天璽同凱旋門就分別有6及3宗內地業主沽貨個案,涉及成交金額約1.19億及1.37億元。

買豪宅比例連跌三季

另邊廂,上季樓價1,200萬元以上豪宅登記買賣中,已知內地個人買家比例就回落唔少,按季減5.8個百分點至27.3%,並連續第三個季度下跌,累積跌幅13.8個百分點。

所以上季本港豪宅內地買家及內地業主沽貨比例差距收窄,錄得19.3個百分點差距,比起第一季嘅26個百分點明顯減少,睇情況呢班內地客幾豪都好,似乎內地嚴控樓市對佢哋唔多唔少都有影響。

劉Sir

西南九龍帝峯.皇殿上季錄得八宗內地業主沽貨個案。(資料圖片)