股海實戰：神州數碼攻守兼備

人行降準再次落空，缸邊友等到有點麻木。短期市場焦點仍放喺中企業績，至於外圍就要睇下周Jackson Hole會議上伯老有咩講。展望本周恒指波幅，預料將介乎19,800至20,300點水平。

今年上半年仲有唔少人講擔心七月過後本港樓市會大變天，但結果顯示大家過慮了，近期連居屋都頻現癲價成交。樓市氣氛暢旺，有利地主股下半年推盤表現。事實上，近兩個月地主股氣氛改善，照計物業代理股都可受惠，上周見田生（00183）有異動，不妨順道（目及）實美聯集團（01200）。

內房表現唔對路

反觀內房股表現就唔多盞，SOHO中國（00410）宣布中績純利倒退並減派息，上周五股價跌5.4%。市場開始流傳，下周二恒大（03333）份中績亦可能會遜於預期。近三個月恒大股價呈一浪低於一浪，上周跌至3元關略作反彈，究竟股價係預先反映中績表現，抑或仲未跌夠，就要留意業績數據及未來數月嘅銷售進度，純睇走勢下一支持區喺2.7至2.8元水平。

個股方面，好耐冇提過隻資訊科技股神州數碼（00861）。截至今年三月底止年度業績勝預期，收入及純利按年增幅均逾兩成，毛利率提升0.66個百分點至7.55%，派息增加，整體表現優於市場預期。講起呢隻股，最令阿莊感興趣嘅，係其「中國智慧城市」布局，在積極完善智慧城市解決方案下，年內總體跟蹤覆蓋城市達67個，並相繼與鄭州、南京、武漢等城市新簽戰略合作協議，簽約嘅戰略合作城市已達到11個。隨着內地持續城市化發展，呢方面嘅業務潛力優厚，將會是繼過去數年公司業務成功由IT銷售升級至IT服務之後，又一次大升呢行動！

神數股價自今年次季高位16.62元回落至上月低位11.38元，累跌達三成，聽聞係有急於套現嘅基金沽貨離場，睇完份年度業績，小股東應該揸得放心。論股價走勢，11至12元乃主要承接區，近周成交有所增加，上周五收報12.9元，正逼近250日線及50日線13元關，現價預測市盈率不足10倍，息率有3厘，攻守兼備。若能以大成交破位而上，可向14至15元阻力區推進。