樓市出更：兩地睇好戲 九肚呎價勢過萬

本周五緊接有沙田九肚及離島坪洲兩幅地皮截標，兩地都係由政府主動推出招標，屬於今個財政年度第二季推地計劃嘅一部分，無獨有偶，兩幅地皮曾經有財團試勾過，但都無功而回，反映都好受財團歡迎，所以估計競投反應都會好激烈；市場預計，兩幅地皮可以為庫房帶嚟最多36億元收入，其中九肚豪宅地會吸引中大型發展商興趣，估計最高成交價約35億元，呎價超過1萬元。

劉Sir睇番資料，九肚第56A區B3同4豪宅地盤，舊年九月已經有財團試勾失敗，幅地面積有成21萬方呎，總樓面約莫接近32萬方呎，以規模計係新發展區內第二大地皮，同埋幅地又無限量同限呎條款，可以打造成豪宅項目。

九肚地無限制 值35億

好似啱啱喺五月份，資本策略（00497）嘅同系公司尚家生活，用咗超過一萬元一呎去買同區B5豪宅地盤，由於事隔只係幾個月，佢嗰口價可以做B3同4豪宅地盤嘅參考指標，有測量師就估計，幅地要成一萬到萬一元一呎，成交價估計要接近32億到35億元左右。

其實，呢幅係九肚地區第3幅拎出嚟賣嘅豪宅地，區內最大幅地皮係早前首幅推出嘅「限量地」A地盤，至於上次B5地盤都有成16個財團入標爭奪，相信B3同4地盤應該都會好搶手。

坪洲商住 搶閘勾唔成

同日截標嘅坪洲坪利路商住地，入標反應有機會挑戰上次坪洲東灣賣出嗰幅地，坪洲東灣有成30個財團爭崩頭，原因相信係地皮細細，中小型發展商同區內地膽都啱胃口。

而今個禮拜截標嘅坪利路商住地，早喺五月尾政府已事先表明會安排推出，但嗰頭就有財團等唔切响六月試勾，最後唔成功，可能係有財團想摸吓底；由於地皮包括有兩萬幾方呎商業樓面，所以市場估價都有好大分歧，成交價由3,000萬到約一億元都有人估，樓面地價由540元到接近1,800元一呎。