股海實戰：長江生科開花結果

港股喺兩萬點水平反覆偏軟，大市成交僅361億元，真係水盡鵝飛！事實上，唔少投行朋友喺到休緊假，但唔好誤會係抖暑，而係早前被裁，仲未搵到新職而已。少咗咁多人參與嘅魚缸，一潭死水，個股無論邊一個板塊，炒風都好短暫，落場炒兩轉唔識落車隨時又要坐艇！嚟緊愈近各地選舉，除非執政黨造勢推新政策，否則有心理準備魚缸氣氛會逐步轉靜。

國務院督查組對地方調控政策是否到位進行調查，尋日官方傳媒引述相關人員指，行動定調係「從嚴調控」；至於新一輪調控措施，可能包括提高二手房交易稅或增加房產稅試點城市。顯然，喺中央高度關注下，內房股維持有波幅冇升幅嘅局面。

券商股成空軍目標

至於內銀股，嚟緊將進入業績期，交通銀行（03328）嘅A+H非公開發行計劃獲中證監批覆，集資逾五百億人仔，其中H股定價為每股5.63元，以尋日收市價5.24元來睇，即係話國家隊同大笨象（00005）要以溢價認購，若小股東唔想權益被攤薄，喺市場買貨仲平啲！

尋日內地券商股受壓，中信証券（06030）及海通證券（06837）分別跌7%及4%。內地傳出多個負面消息，又話有券商涉海外投資巨虧、分析員質疑業績、券商股解禁等，如此「立體聲」發放流言，似係空軍所為，沽唔沽得落就要睇阿爺面。

股海風雨飄搖，也許股民會更加明白樹大好遮蔭嘅道理。好似超人旗下嘅長江生命科技（00775），幾十億市值，相對同系和黃（00013）等大哥真係算係「細」，年頭股價才三毫幾子，三月份炒過上0.555元後，反覆回落至五月份低位0.385元始回穩，上周四曾以大陽燭示人，原來係申請分拆業務上市，尋日股價再逆市升12%，收報0.53元。

阿莊記憶中，當年八字頭創板股，真正搞科技業務，直到今時今日又已成功轉主板，年年有錢賺嘅科技公司，真係唔多。長江生科過去三個財政年度每年賺過億銀、今年上半年賺1.15億元，雖然現時股價還原早年供股都仲處於低位，但若然公司陸續分拆成熟項目上市，有望釋放多年投資嘅價值，開花結果。只係依家係大淡市，股份估值普遍低迷，更有潛力嘅股票，市場能給予嘅溢價實在難與旺市比較。

長江生科現價離今年三月份高位不遠，下一個阻力位就要睇去年二月高位0.68元，初步支持喺0.48元。