股海實戰：一拖反彈勢頭佳

內地七月份CPI數據符市場預期，恒指乘勢突破20,200點，曾高見20,300點。有分析指部分基金見全球央行正着手放水刺激經濟，魚缸風險下降，所以將部分資金調出債市重回魚缸小試牛刀，若然升市確由資金流推動，恒指繼續挾淡倉唔需要太多理由。尋日內地傳中央正制訂調控樓市新政策，但內房股照升就係一個好例子。

押注內銀 中行可取

回看七月下旬表現，首先係中移（00941）、聯通（00762）起動，跟住係石油股、煤炭股、本地地產股，尋日連內房股都開始發力，內險股似乎亦蠢蠢欲動，數來數去係內銀股未真正發力，相信等月底公布業績，好醜自有分曉。想押注內銀股，可留意中行（03988），皆因股價近周企得穩喺250日線，尋日收報3元，10日線有勢升穿250日線，有望扭轉自去年中以來嘅弱勢，故不妨多加注視。

內地A股今年反覆尋底，股民輸到驚，之不過，本周三主板大股第一拖拉機（00038）發行A股首日掛牌，做價狂飆，令人眼前一亮。尋日A股農業股氣氛做好，一拖A股再次漲停，收報9.74元人仔，H股收報6.8元，AH溢價高達174%。

其實，自本周初國家發改委印發《全國農村經濟發展「十二五」規劃》，農業股經已炒咗好幾日，事關規劃表明要加大對農村金融政策支持力度，並會致力拓寬農村融資渠道，發展農村保險事業，支持符合條件嘅涉農企業上市。一拖這幾年都受惠農業補貼，有生意做又唔怕收唔到數。近年更開拓出口市場，如購法國農機公司，並喺新疆建廠配合拓展中亞市場。如今已成功登陸A股市場，加上A股給予農業股嘅估值較高，變相有利改善H股估值。

去年一拖盈利倒退兩成，現價往績市盈率11倍，公司將於本月廿四日宣布中期業績。市場預計其今年純利為6.44億人仔，即按年增五成，現價預測市盈率約8倍。睇埋股價走勢，近日受A股表現帶動，H股一連升穿10日及50日線，短線回吐守穩6.5元樓上，圓底反彈之勢可望持續，下一個較大嘅阻力區喺7.3至7.5元。