樓市出更：北水征服西洋菜南街

內地旅客消費強勁，本港唔少傳統街道商戶都大執位，以吸納北水客源；其中，部分時段改為行人專用區嘅旺角西洋菜南街，依家單係與數碼影音及化妝品相關貨品嘅舖頭，已經佔據全條街地舖超過一半，情況前所未見，依家條街地舖平均呎租已經去到500元，較一年前升咗一倍。

十多年前，西洋菜南街係香港人經常買嘢嘅好去處，條街除咗有皮鞋同時裝賣之外，仲有舊式茶餐廳。不過，自從開放內地人到港自由行後，條街開始出現變化，凡係內地豪客鍾意買嘅嘢，商戶就喺度狂開舖吸北水。劉Sir計過，成條西洋菜南街差唔多有100多間舖，其中連鎖電器及電訊商戶合共有近40間，而化妝品店就有超過15間，成條街超過一半由呢類店舖租晒。

珠寶店貴七成租舖

有代理話，由於上述連鎖店財力雄厚，所以條街依家平均呎租升到去差唔多500元，同一年多前比升咗一倍。好似該街道一個雙號地舖，面積約1,300方呎，原本由眼鏡店及時裝店租用，早前畀連鎖金飾珠寶店每月約150萬元租咗，呎租1,100多元，較前租升近70%。

劉Sir尋日喺西洋菜南街遇到個來自惠州嘅旅客，佢話五年前已經開始到旺角購物，條街變咗好多，唔少都係佢哋鍾意買嘅嘢，愈來愈方便。不過，港人Hebi就抱怨，條街好多舖頭都係為內地豪客而開，冇乜嘢啱香港人買。

士多老闆準備撤退

事實上，西洋菜南街商戶十居其九都係為吸北水，唔少商戶未能配合，都面臨淘汰。如年前有間連鎖運動用品店租咗銀城廣場一個約2,000多方呎地舖，租了一年多已經搬出，結果由電訊公司以每月近160萬元租用。

條街有間開業三十年嘅士多，個舖面積只有數十方呎，個租客話內地人唔係佢哋客源，生意未有受惠，加上便利店搶生意，如果業主加租，佢會唔租，而附近租金咁貴，好難再捱落去。