股海實戰：首鋼啱炒家胃口

市場觀望內地經濟數據，恒指唔上唔落，只係微跌7點作結，大市成交458億元。上個月官方公布最新CPI數據前，人行先下手為強減息以穩人心，但今次則未見動靜。有指七月份CPI同比增幅可能低於2%，或引起市場對經濟增長進一步放緩及會否出現通縮嘅憂慮，且觀望今次官方又有咩新政策出台應對。

東星能源不妨冷敲

近期大市沽壓減退，多咗人留意股仔表現。好似彤叔家族旗下嘅新時代能源（00166），近周股價反覆回升，係咪有消息跟尾就要等着瞧。想冷敲股仔，可以睇吓隻東星能源（00668），呢隻股前身係香港飲食，○九年控股權易手，現從事投資控股、經營食肆同煤礦開採業務，今年以來先後向大股東收購內地兩個物業項目，聽聞大股東注資活動未完，本周股價由低位回升，只係人氣尚待改善。

再有本港上市公司遭海外研究機構狙擊。事緣研究機構Glaucus發報告質疑西部水泥（02233）嘅帳目，搞到尋日該股上晝中途停牌。翻查紀錄，七月中旬以來該股沽空股數明顯增加，難免惹來先沽空後唱淡圖利疑雲。雖然「狙擊手」有申明利益，但係咪有申報就可以明刀明槍搵食，實在值得商榷。

講開又講，呢間Glaucus今年四月曾先後兩次發報告狙擊首鋼資源（00639），引致其股價大幅波動，但隨着公司作出澄清，加上有大股東首鋼集團嘅牌頭撐住，該月股價好快重回正軌。至於其後股價反覆向下，主要係受煤價下跌影響，表現與整個煤炭股板塊一致，而五、六月亦見有公司主要股東不斷入場增持股份。

由於踏入旺季，煤價開始回升，資金流出電力股轉戰煤炭股嘅趨勢愈來愈明顯，加埋尋日龍頭股神華（01088）股價終於升穿30元關，呢轉若能企穩30元樓上，可上試32至33元。煤炭股炒味漸漸升溫，論價位可能首鋼資源會較啱炒家胃口，10日線正向上移，一旦升穿50日線，將現黃金交叉利好訊號，小注投機，主要阻力喺五月高位2.7元，2.05元不容有失。