樓市出更：深水埗舖搶貴直逼一線區

近排一線黃金地段舖位買賣大減，原因唔係買家手緊，而係業主索價高，所以唔少資金都轉到二、三線區尋寶，好似有香港秋葉原之稱嘅深水埗，區內租戶除咗有好多連鎖電訊產品商，仲有外區愈來愈少嘅地道食店，難怪近月地舖買賣價量飆升；有代理話，上個月該區地舖買賣突破30宗，按月多逾五成；目前區內福榮街同福華街部分近港鐵站地舖，平均呎價逾4萬元，同舊年比升咗約80%，升幅直逼一線區舖位。

依家旺角一線地舖呎價最少要十幾萬元，最慘嘅係業主唔憂賣，所以好多投資者都落去二、三線區搵舖。以深水埗為例，由於區內愈來愈多新盤入伙，加埋來自外區嘅消費者數字日增，區內消費額增長可觀，刺激該區優質地舖買賣價量齊升。

福華街舖7800萬摸出

香港置業方猶輝（Jacky）同劉Sir講，上個月深水埗地舖買賣丁財兩旺，成交宗數已超過30宗，按月多出超過五成，而區內指標街道福華街同福榮街一帶呎價升幅最為明顯，平均呎價已升至約4萬多元，好似福華街146至152號黃金商場地下單號地舖，面積約1,500方呎，物業兩年間兩度轉手，啱啱以約7,800萬元「摸出」，呎價高見約5.2萬元，期內升值約62%。

講到深水埗，不可不提鴨寮街，條街依家平均呎價約7萬元，由於條街多年前已有投資者入市，目前呎價按年升幅逾50%。

4.8億購欽州街一籃子

另外，鄰近西九龍中心一段嘅基隆街，其中該街288號地下及閣樓剛以約6,000萬元易手，呎價超過3.7萬元，物業約八年升值逾四倍。

深水埗舖位升值潛力高，就連買開全幢物業，買地起樓嘅資本策略地產（00497），今年三月亦斥約4.8億元購入該區欽州街94號地庫、地下及1樓等一籃子零售物業，平均呎價約1.7萬元。該集團主席鍾楚義話，睇好香港數碼產品消費市場，而上址正係香港數碼及影音產品集中地，其商舖租值能力絕不比一線區遜色。