Fundman睇市：業績期大孖沙一樣小心

歐美央行按兵不動，股市投資者卻係未放水先興奮，內地股市在差強人意的採購經理指數下，近日不跌反升，股民等央行接濟成了股市主旋律。上周於美國公布七月非農就業數據增長超過10萬，就業市場不能用「好」字去形容，但斷估未算得上「衰」。十一月美國總統大選前，是否要拉上助選之嫌去提早放水，機會只係五五波，心口掛個勇字的務必要考慮相關風險。

恒指尋日升73點，報20,072點，連續兩日壓住响21,385至18,056點跌浪的0.618反彈阻力20,113點樓下收市，技術上，最好等破位才確認大市轉勢。渣打（02888）被美國紐約州金融局指控洗黑錢，股價一度跌至149元，落番去年十月上升裂口，收報160.1元，跌28元。渣打最終會否被罰款甚至被吊銷紐約州經營牌照？業績又會唔會因罰款需要提撥？在下無預知未來水晶球，但尋日一跌，股價由吸引變成非常吸引，只可惜事件影響投行對股票評價，卻又未至於令評級機構降級，幾隻Perpetual bonds尋日都見回吐，如果未來幾日債息重返8厘樓上，好息一族，可以諗吓沽番多少近日升幅唔細的REITs，轉買渣打債收息。

思捷前景不宜看淡

西班牙時裝品牌Zara，早前以天價千一萬月租，承接H&M旗艦店原址，較後者舊租約出多一倍搶舖。今時今日，訪港同胞勒住荷包，Zara夠膽逆市拓店，唔少同行早已嘩聲四起。Zara點石成金威力，睇思捷（00330）尋日急升可見一清二楚，公司只係簽下前Zara分銷及營運總監Jose Manuel Martinez Gutierrez為新任執行董事及集團行政總裁，工都未返，股價已狂升見13.8元，同前日收市9.97元比較，一日市值多50億元，份合同只係300萬歐元（約2,887萬港元）年薪加花紅，即使未算一本萬利，一賠一百七十三倍大冷門，已經順利跑出。

普拉達（01913）上半年營運數據，營業額15.478億歐元，大升36.5%，當中零售佔總額80.6%，按年升47.2%，批發則升4.8%，直營店同店銷售，增長19%，幾個數字都高於分析員預測數字，另一值得嘉許的，是各地區業務增長十分平均，意大利升21.7%，意大利以外的歐洲升37.3%，亞太區升45%，美洲升31%，日本升34.2%，營運指引上，很難找到可以挑剔的地方。

老實講，預期市盈率26.3倍PE的普拉達真係唔平，比起部分知名歐洲品牌，如17.8倍的LVMH、18.5倍的Burberry都貴，估值同Hermes及Salvatore Ferragamo睇齊。不過，八月業績期殺到，發盈警公司破晒紀錄，為怕誤踩陷阱，大孖沙買貨格外小心，一係等成績表曝光至買，或者押落去業績無死的股票，尋日股價創新高，普拉達顯然屬後者。