股海實戰：上實穩陣之選

呢期魚缸是是非非特別多，其中過去備受投資者青睞嘅銀行股，呢幾年衰運仲未行完。以為安渡○八年金融風暴可以重頭嚟過，點知歐、美經濟衰到冇朋友，各地收緊監管，陳年舊帳被翻查，又話涉及洗黑錢，又話可能要釘牌，總之呢期做銀行股股東真係無日安寧。好似尋日歐洲一開市，睇住隻渣打集團（02888）喺一分鐘內由170元插到落155元，之後仲曾跌穿150元，低見149元，單日曾跌兩成，波幅如仙股，缸邊友無不嘩然！

思捷暴升 高追三思

呢邊如落地獄，另一邊卻似上天堂，所講嘅係尋日另一隻異動股思捷環球（00330），因為請到個喺行頭具分量嘅行政總裁，股價一度暴升逾三成。之不過，歐洲市場不景氣係客觀事實，唔係一個打工仔可以左右，加上咁多家零售企業要重新執過，需要唔少時日，高追宜三思。

市傳中核建啟動上市計劃，游資借勢追捧核電股，東方電氣（01072）、上海電氣（02727）及中廣核（01164）升幅介乎4.5至13%不等。電力股繼前日華能（00902）急跌後，尋日輪到華潤電力（00836）同華電（01071），相對而言，中國電力（02380）算跌得少，宜暫避為妙。

睇番隻老牌紅籌股上海實業（00363）。自去年第四季開始，股價多次回落至20元水平即止跌回穩。阿莊喺六月初曾推介上實，話股價落到21元，距離底部不遠，留意母公司會否出手增持。果然六月底母公司入場增持57萬股。

阿莊見其股價近日10日線重上50日線，尋日更以大成交升穿上月高位，有番啲鑊氣，收報21.9元。技術上，短線成交配合突破22元關口嘅話，下一個阻力位喺250日線23.2元，20元乃鐵底，不容有失。

睇番數據，現時上實嘅往績市盈率為5.7倍、市帳率僅0.76倍，息率4.9厘。市場估計其現價一二年預測市盈率6.7倍、息率4.8厘，估值偏低，主要反映近幾年公司多咗涉足內房業務，偏偏房市仍在當局重點調控之中。但其實除咗內房業務之外，上實還兼營基建同消費品業務，早前管理層表示，擬將喺新加坡上市嘅亞洲水務安排喺香港作雙邊上市，估計喺明年落實。預計公司將於八月底或九月初公布中績，若消息對辦，股價有改善空間，買嚟揸既有息收，股價底部支持又心裏有數，加埋有阿爺照住，揸得安心。