樓市出更：瓏璽入伙天池屋壓軸登場

天價新盤特色戶備受追捧，新地（00016）位於西南九龍嘅臨海豪宅瓏璽，剛開始發信通知業主收樓，發展商尋晚舉行盛大晚會，首度揭開耗資5億元打造嘅住客會所神秘面紗，限量招待一班有份「出錢出力」嘅業主同代理率先參觀，而該盤第8座頂層全新天池示範屋已剛開工裝修，估計兩個月內開放同推售，意向呎價5萬元，勢創九龍站以外九龍區新高紀錄，售價逾1.5億元。

期間新地副董事總經理雷霆仲同大家溫故知新，重申瓏璽去年開售銷情熱爆，全數650伙極速近沽清，套現約140億元，集團剛剛已經開始向業主發出首批入伙通知信，預計今個月二十日前可以通知全數業主收樓。

十萬呎會所率先曝光

雷霆及新地代理助理總經理胡致遠，尋日下晝趁住瓏璽晚會開始前，親自「帶隊」率領傳媒優先參觀佔地約10萬方呎嘅會所連園林，劉Sir當然要先睹為快。

雷霆仲話，瓏璽現時只係尚餘10餘伙待售，主要係特色戶，其中第8座頂層天池屋已加緊進行裝修，最快兩個月可以開放同推售，該單位面積3,005方呎，屬複式連天台設計，意向呎價5萬元，除咗勢創項目新高外，仲挑戰九龍站以外九龍區新高紀錄，售價要超過1.5億元。

胡致遠亦話，瓏璽全盤只有4個複式天池屋，舊年開售嗰陣，第1座面積約3,500方呎頂層複式天池屋就以呎價約4.3萬元售出，所以第8座天池屋嘅意向呎價較1座高出逾10%。佢又話，集團並無接獲瓏璽業主要求延遲收樓，相反好多業主要求提前收樓，集團都無需推出樓按等優惠協助買家上會。

天晉特色戶挑戰新高

除瓏璽外，劉Sir收到風，新地尋日向將軍澳區代理，發出天晉約33伙貨尾最新價單，售價維持原價推售，其中1座45樓面積2,455方呎A室天池屋，意向呎價2.2萬元，挑戰項目同將軍澳區新高，其他貨尾單位呎價11,460元起。