股海實戰：海通質素唔輸蝕

美國經濟數據佳，道指重逾萬三關，滙控（00005）ADR做好，本周港股高開成定局。唔單只股市，商品期貨亦獲提振，CRB商品指數回升2%，油價升近半成。此外，美匯指數上周回落至82.3，是否意味資金流向開始改變，本周宜密切留意各項指標變化。

雖然人行短時間內先後兩次減息，但傳聞四大行七月新增人民幣貸款僅2,200億人仔，顯見減息未能刺激借貸需求，上大人有必要做更多嘢，始能實實在在刺激到疲弱嘅經濟。

已具長線投資價值

上周五市場曾盛傳收市後內地或會宣布平準基金入市，又傳人行快將降存備率，但無一兌現。反而，上周五見中證監宣布落實推出新三板，勢將考驗市場擴容能力，究竟嚟緊中央喺激活魚缸交投方面有咩對策，就要等着瞧。

據中證監資料，目前A股動態市盈率為12.7倍，低於○五年六月六日滬綜指998點時嘅19倍，亦低於○八年十月二十八日滬綜1,665點時嘅13.68倍，說明A股估值已展現出長期投資價值，呢一點阿莊都好認同。若以滬綜指兩千點心理關口為鐵底作基礎，現水平入市，潛在跌幅為6%；再以滬綜指250日線2,369點計，潛在升幅為一成多啲，值博率不言而喻。

若想買金融類股份，可直接聚焦券商股。早前提過嘅中信証券（06030）係實力之選，只是最近收購海外資產惹關注，加上已預先炒作國指新貴概念，現水平宜先觀望，又或可將視線轉移相對落後嘅海通證券（06837）。

海通上半年賺20.3億人仔，同比跌9%，相對期內A股表現，成績算係有交代。雖然目前A股主要指數同交投均處低水平，但相信季內會有突破，下半年嘅經營環境有望獲得改善，以目前市場平均預估今、明兩年預測市盈率分別係18倍及15倍，估值較中信証券為低，呢個係行業老大同老二嘅分別。

但論質素，其實作為老二嘅海通實力亦唔輸蝕，四月下旬上市以來，大戶收貨經已收咗三個多月，相信貨源已歸邊。再睇海通嘅股價走勢，前周低見9.05元後回穩，已重上10日線樓上，14日RSI轉強，50日線現處10.4元，突破此位可再試掛牌以來嘅主要阻力區11.5至11.7元，惟9元關口未宜有失。