樓市出更：灣畔原裝翻叮打定輸數

將會喺今個星期三截標嘅西鐵荃灣西站五區灣畔限呎地，由於今年一月試過流標收場，加上招標條款無變下，劉Sir都唔敢睇好，亦有部分發展商對入標有保留。好似年初投得貼鄰城畔項目嘅華懋集團話，雖然有興趣入標，但始終規模太大要「計數」；同時有測量師更估計今次可能得番3份標書，仲少過年初嘅4份，至於項目估值就下調至介乎約73.76億至89.4億元。

今年初荃灣西站五區城畔及灣畔兩項目一同截標，其中城畔由華懋以約26億元投得，每方呎樓面地價3,124元，由於有協同效應關係，劉Sir相信華懋入標灣畔機會會大啲。

華懋：額大須計數

但華懋集團售樓部經理吳崇武就話，集團的確對灣畔有興趣，早前亦有遞交意向書，不過，項目涉及投資額非常龐大，仲要「計數」先決定會唔會投標。

而會德豐（00020）副主席梁志堅日前亦透露會研究入標灣畔，但入標組合係咪同上次一樣就未有決定，上次該集團夥拍新世界（00017）同南豐入標；至於南豐發展董事總經理蔡宏興亦話會研究項目。

劉Sir話畀大家知，其實灣畔於去年十一月第一次推出就接獲17份意向書，惟最終標書數目只有4份，今年一月仲正式宣告「流標」。而政府為咗加快土地供應，事隔不足半年，喺六月就再度推出灣畔招收意向，但接獲意向書僅14份，項目亦喺上個月港鐵（00066）大圍站上蓋項目流標第二日即刻趕住招標填補供應。

話大圍站項目流標對灣畔無影響梗係無人信，市場亦對呢個規模龐大嘅鐵路上蓋項目未有投予信心，部分測量師仲大手調低估值最多一成，最高估值由當時約95億元調減至約89.4億元。

周三截標恐得3份

高緯環球張翹楚同劉Sir分析，因為灣畔招標條款同年初流標時不變，以意向書數目推測，今次可能會少過上次，估計得番3份左右。佢仲話，灣畔項目今次都有再度流標風險，但可以期待係政府會唔會調低底價，佢估計樓面地價維持約3,750元。