股海實戰:第一視頻小注跟炒

黎明前嘅黑暗係最難捱!即使國家主席出聲派定心丸,A股都係升得一日就倒跌。魚缸對好消息反應唔大,反而一有咩利淡消息,不問真假就掉頭跌,底因乃信心低迷,人氣極為薄弱。如今滬綜指距離兩千點心理關口不遠,若然八月份依然唔見降準,或其他可以「立竿見影」嘅提振經濟措施出台,各位都係咪咁心急估底。

美大選聯儲會做嘢

美國聯儲局一如預期未有推QE3,加埋A股弱不禁風,恒指低開後一度跌至全日低位19,651點,收報19,690點,跌130點,成交432億元,其中窩輪同牛熊證成交約137億元。阿莊依然相信,美國大選前聯儲局必會做番啲嘢,估計政策窗口喺九月中旬至十月。綜合中美兩國情況,呢個月各位可以繼續靜養抖暑,大動作可免則免。

尋日兩地魚缸回軟,主要係內地傳北京擬取消預售房制度嘅消息,拖累內房股走低。由於取消預售房制度將影響房企資金流轉,難怪可震散內房板塊,香港內房股普遍跌3至4%。但阿莊認為,如今上大人唔想樓價飆,但唔係要樓市死,故傳聞可信性唔大,執筆時聽聞住建部已作否認。

魚缸再發現「殭屍股」蹤迹,雨潤(01068)急彈19%,霸王(01338)升7%,想小注跟炒最好走即日鮮,且須嚴守止蝕。此外,久久未見動靜嘅第一視頻(00082)股價終於「憤怒了」,單日彈升25%至全日高位0.78元收市,成交股數達1.58億股,創今年五月四日以來最大單日成交股數。

五月公司按每股0.93元配股集資1.6億股,集資1.44億元,之後股價反覆走低,至上月見0.58元終止跌,相信要減持嘅基金都已減得八八九九。尋日該股以大成交踢穿50日線,主要係受其管理層指,若市況轉好,會盡快完成分拆手機遊戲業務上市,以及旗下兩個手機遊戲(包括「憤怒鳥」)快將推出市場嘅言論所帶動。

一隻估值咁低迷嘅股份突然炒起,跟唔跟得過,其中一個準則係睇成交夠唔夠。尋日第一視頻人氣算係合格,照計短線回吐守得住尋日嘅平均成交價0.72元,班炒家冇咁快停手,下一個較大嘅阻力就睇番五月份配股價0.93元,支持位可參考50日線0.68元。湊熱鬧小注跟炒唔係唔得,但要提一提嘅係,呢隻係民企股,仍選擇落場者,記得食得鹹魚要抵得渴,冇得輸打贏要!

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

阿莊

第一視頻重提分拆手機遊戲業務上市,刺激股價急升。圖為公司主席張力軍。(資料圖片)