樓市出更:加連威老道轉型吸大款

一線零售區舖租由內地豪客撐起,不過近年連二線街舖亦被攻陷,好似以往有唔少本地出口成衣及時裝店嘅加連威老道,已逐步有其他行業進駐,被主攻內地旅客嘅金飾珠寶、連鎖電器店及化妝品店等蠶食,計吓數,差唔多已經佔據咗條街兩成街舖;有代理話,依家條街新租客呎租差唔多要千幾元,同舊年比升咗最少1倍。

加連威老道有唔少係本地時裝店同出口店,重有細細間嘅小食店,不過近年已逐步轉型,租金亦水漲船高,劉Sir睇到依家好多舖頭品牌同尖沙咀彌敦道、海防道同金馬倫道冇乜分別,更加有唔少大型金行同化妝品店,絕對係食正內地人條水。

珠寶店進駐 漲租倍七

依家喺加連威老道與加拿分道交界一個單邊全幢物業,面積約3,000方呎左右,由一間上市金飾珠寶店以每月大約220萬元承租,之前上址租客包括化妝品店,估計新租金高超過1.7倍。來自上海嘅夏先生同劉Sir講,加連威老道賣嘅嘢同一線街相差無幾,加上無咁逼人,所以樂意前來掃貨。

另外,內地旅客來港必掃貨品之一嘅數碼影音,同埋智能手機,依家分別喺加連威老道有兩間首度進駐,其中一間連鎖電器店月租大約35萬元,比之前服裝出口店月租高逾1倍。

雞蛋仔舖「食正」擴充

而有間連鎖服裝店早前放棄租用旺角大型商舖後,早前就轉租加連威老道一個三層高大型購物樓層,月租大約180萬元。

咪以為賣小食就賺唔到內地人錢,劉Sir有個老友叫朱老闆,喺加連威老擺檔十幾年,由租用廿多方呎舖仔開始,一向賣開雞蛋仔等小食,佢話內地客好鍾意買地道小食,月前擴充租用同街一個約千方呎地舖,月租要成廿萬元。有代理話,佢依家畀嘅租金,仲貴過附近連鎖內衣店租金。

舖市旺,紀惠集團廖偉麟近排成日買舖,佢啱啱向城中飲食界名人鄭威濤等買咗灣仔駿逸峰地下至2樓,涉資3.55億元,依家車行每月108萬元租用,收租回報3.6厘。

劉Sir聽中原徐康達講,一位蔡姓投資者短短一周賣出兩個舖,套現逾1.2億元,其中剛售嘅旺角通菜街224至226號地舖,涉資約5,800萬元,一年半帳面賺1,450萬元,賺幅約33%。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

劉Sir

近年尖沙咀加連威老道不少街舖變成大型連鎖店,主攻內地客。