牛熊對壘：A50唔跟跌可博17711

港股四連升，重返250日平均線，七月最後一日恒指收19,869點，仍較月初高位19,835點低些少，未能發揮七月翻身的所謂投資傳統，但總好過五、六月份時一片恐慌的氣氛。

昨日成交增至510億元，淡友全程被挾，38隻熊證觸及收回價被劏，當中32隻是恒指熊證，被收街貨約六億份，熊證重貨區的防線退守至19,900點。

近期恒指累升近千點，每日都幾乎裂口開高，即日波幅唔大，牛熊市場隔夜坐貨兼做啱邊先至贏到大錢，即日鮮炒作其實不易為。昨日適逢月結，大市轉趨活躍，牛熊證成交按日升31.6%，達86.95億元，佔比升至17%。

按牛熊證街貨量，散戶繼續傾向唔信大市續升，前日恒牛總街貨減少1.9億份，總數跌至15億份以下，熊證同日勁增6.7億份至25.99億份，兩者差距10億份，如此一面倒的分布，加埋熊證重貨區極之貼價，為大戶殺熊提供了足夠誘因。

內銀窩輪人氣旺

踏入業績高峰，輪場成交不升反跌，昨日未有跟隨整體市況而變得活躍，成交按日微跌0.4%至52.77億元。重磅股滙控（00005）、國壽（02628）繼續是僅次恒指之後最活躍個股輪資產，分別佔去整體窩輪成交比例14.49%及10.14%，但個別內銀窩輪人氣突旺，如建行（00939）窩輪成交升27%至4.4億元，工行（01398）更增至1.6億元，升31%。

兩隻股份均升逾3%，動力甚強，有望再戰高位。早前，內地不對稱下調息率被視為不利內銀的舉動，股份沽壓不輕，但沽到咁上下已見股價跌唔落，炒友就要快速轉向，本欄亦不停叫人留意內銀Call輪，睇位上落都應該有得執。

昨日亞太股市升多跌少，A股繼續開倒車，滬綜指跌至2,103點，但安碩A50（02823）升1.2%至9.73元，早於A股反彈。其實，過去五日港匯轉強，恒指即日低位一日高過一日，不排除挾開有條路，主攻落後Call輪贏面較大。A中大和購（17711）明年一月二日到期，行使價9.88元，實際槓桿約十倍。