Fundman睇市：中資板塊唔使睇咁淡

環球憧憬歐美英央行放水，唯獨A股完全沾不到半點樂觀氣氛，滬綜指尋日跌住收市，調查機構訪問內地基金持倉，顯示持貨比例跌至不足八成，套用揸5%現金算睇淡的「國際慣例」，內地芬佬對股市前景，同今年將係末日無乜分別。認識的內地基金，的確有清一色睇淡的傾向，經驗告訴當沽家已經「傾囊出售」，股市接近見底。

瑞銀以「山窮水盡疑無路」為題，建議開始睇番A股，預測年底滬綜指重上2,600點，主要理由是下半年內地市場機會比上半年大，內地企業毛利率改善拐點預期會在第四季出現，尤其第三季物價下跌，加速企業降低庫存，展望物價第四季開始穩定，連跌多季之企業毛利率也將觸底，能夠受惠於成本下降的板塊包括航空、電力、家電、汽車、紡織服裝及水泥等，且看這批股份能否柳暗花明。但其實筆者兩個月前已建議要買番業績由紅變黑的電力股，近期汽車股沽空明顯收斂，低位見收集，開始有留意必要。

東風初見芬佬手影

東風集團（00489）旗下A股公司早前發盈警，大好友高盛護航，強調東風純粹揸三成股權，去年佔總收益不到2%，但東風股價最後都試穿10元。

客觀環境，內地車廠未來三至五年在競爭加劇之下，毛利率壓力會逐漸浮現，但見近排分析員對內地汽車行業有另一睇法，一是零部件成本效益提升，原材料價格高位回落，其次是國產汽車出口的故事。中國貴為全球汽車產銷大國，可是去年僅3%國產汽車出口。有分析員預期，未來幾年內地車廠重點是推動出口，估計年增長會達兩成五到三成，東風身為內地合營車廠龍頭，坐擁先天優勢，近兩日大成交做好，初見芬佬入貨手影，應可放心擺落購買名單之中。

熔盛重工（01101）大股東張志熔捲入美國的內幕交易調查，醜聞配合盈警的消息，兩日之內股價由1.4元跌至1.07元收市。二十個月前公司才以每股8元上市，當日認購的股民認真杰撻撻！先不談市場對民企信心早已盡失，睇見老牌船廠廣船（00317），股價同樣低處未算低，管治危機外，同時反映造船業客觀環境並唔理想的事實。早前和海運公司高管傾開，近半年歐美航線一池死水，內地出口放緩，加上採購油、煤等天然資源胃納細咗，閒置船愈來愈多，造船業最壞時刻恐怕未過，要博反彈真係要諗清諗楚。

嘟QR碼睇公司派息

在業績期內，上市公司排隊派成績表，對投資者來說，公司盤數做得靚唔靚，當然緊要，但點都及唔上派息咁重要。依家智能手機大行其道，加上QR碼應用上愈嚟愈方便，想知道自己揸住隻股票有冇息派，用手機嘟一嘟《太陽財經》行情版的「派息及沽空資料」QR碼，立即有得睇。