股海實戰：中國南車商機處處

在憧憬歐、美再開印鈔機之下，港股本周連升兩個交易日，恒指終現突破，自五月上旬以來恒指首次重上250日線樓上收市，成交增至510億元。喺決定追唔追貨之前，當然要先知道目標。若然只係上望兩萬點心理關口，萬一今次係假突破，分分鐘又震番落18,800點水平，計落博唔過，故建議暫時少沾手指數相關衍生工具，繼續炒股唔炒市。

尋日市場傳出，工信部擬降低鋼企嘅增值稅，消息刺激鞍鋼（00347）、馬鋼（00323）及重鋼（01053）上升，升幅介乎4至5%。此外，近日寶鋼表示旗下湛江項目註冊資本加大，主體工程會喺年底前開工，由於近年中央針對鋼鐵業產能過剩問題，嚴批新產能項目，若大型鋼企重新開展新項目，也許對產業政策轉向有正面啟示。

近月內地先後有地方政策推出大型基建項目，搶先中央出招刺激經濟，但錢從何來係一個問題，過於依賴地方政府舉債一來風險高，且效率成疑。呢十年八載，中國經濟發展一日千里，民間積聚財富，如何引入民間資金參與已成為國策。近日溫爺爺就話，要盡快推出民資參與嘅重點項目。

講開呢個問題，發改委剛批核鐵道部今年嘅中國鐵路建設債券發行額度為1,500億人仔，規模創歷史新高，但現時鐵道部負債達2.4萬億人仔，全國一萬公里鐵路項目正等着開工，單靠國家印銀紙支持嘅做法行唔通，鼓勵和引導民間資本投資鐵路係大勢所趨。近日發改委提出將鐵道部部分相對閒置嘅線路同土地等資產變現籌資，並鼓勵地方政府以城際鐵路加物業開發嘅模式，聽落做法可取。

現水平先買一注

打從中國經濟實施改革開放，鐵路業算係最遲對外開放嘅「肥肉」。去年溫州動組車事故有失亦有得，至少可以迫使官方決心改革鐵路業。涉及鐵路業嘅資產龐大，除咗鐵路硬件同軟件製造之外，周邊還有餐飲、旅遊、房地產開發，可謂商機處處。只要有新資金加入，鐵路業融資能力增強，項目加快建設，專門製造鐵路用車嘅中國南車（01766）自當受惠。

南車股價已步出去年溫州動車事故陰影，今年以來大部分時間維持喺5至6元水平徘徊。隨着國家對鐵路業嘅支持有增無減，並積極推動行業改革，未來可望再創榮境。投資者若具中長線部署實力，可認真考慮此股，策略可先下首注，待升穿6.3元再加注，目標係重返溫州動車事故前約7元水平，跌穿5元止蝕。