樓市出更：三條大數知代理難撈

樓市前景未明朗，代理响僧多粥少下，生意一啲都唔易做。劉Sir攞到地產代理監管局最新數據，睇到上半年參加資格試考生人數大減約41.2%；截至六月底代理牌照人數亦只按年升咗約5.7%至34,859人，升幅比舊年年底時明顯放緩；首半年該局亦向199名涉及違規代理作出處分，按年大增約30.9%，呢三大數字足以印證「代理難撈」。

今年上半年樓市表現有幾差，唔使劉Sir講都知，地監局主席陳韻雲尋日提到，上半年整體物業登記按年減約22%至約5.48萬多宗，依家樓市仲有唔少變數，故上半年投考資格試嘅考生得6,113人，比舊年同期減約41.2%；單計六月份考取營業員資格試人數得1,496人，按年減約45.6%，期內參加地產代理資格試人數則有1,754人。

交投縮 投訴個案減16%

至於本港個人牌照總和雖然有34,859人，但由於考生少咗，按年升幅只有5.7%，比舊年十二月少咗5.2個百分點。劉Sir仲發現，呢兩年愈來愈多樓市規管措施，班代理一唔小心就會出事。陳韻雲話，上半年該局向199名持牌人或前持牌人採取行動，其中22名須暫時吊銷牌照，大部分主要都係衰喺提供不準確或誤導性資料等手上。

不過，樓市買賣少咗，投訴都自然少咗，原來上半年地監局接獲241宗投訴，相對舊年上半年減少咗約16.3%，其中有17宗係關於一手物業。至於已處理嘅投訴就有219宗，當中有76宗指控成立。

查內地網違規 涉28代理

家陣互聯網科技發達，所以地監局上半年加強咗網上物業廣告抽查，按年增46.4%至325宗，陳韻雲透露，已經同一個內地網站「開咗file」，牽涉5宗個案，涉及5個新盤同埋28名持牌人，主要是發布違規一手廣告，佢仲強調無論刊登廣告公司所在地响邊度，只要涉及持牌人宣傳香港樓盤，該局就會監察。

目前一手規管立法搞得如火如荼，陳韻雲話，有需要會發出相關執業通告協助代理守法，下半年會推廣有關置業同實用面積知識，仲有相關嘅電視同電台廣告。