市場徐想：信義玻璃令人失望
大家都知道，近期盈警股一籮籮，大家避得就避，但係如果一早話盈喜，出來發盈警，似乎就令到有心跟你走轉嘅投資者大失所望，講緊嘅咪係信義玻璃（00868）。
出盈警少賺四成，坦白講，預咗啦。不過，到底係因為外圍差，定係公司自己唔做嘢，令到公司冇貨交，咁管理層就抵打啦！無貨交都算，但管理層作為公司嘅負責人，佢嘅言論同行為都會影響大家對上市公司嘅睇法！話說佢哋喺四月中，曾經同班記者朋友講，第一季公司嘅毛利率創新高，結果就借盈喜炒上咗5%，點知轉過彎一走入直路就走晒樣。
美資基金OZ Captial諗住執好嘢，買入信義新股同一批CB，諗住做「長途伴侶」。殊不知，唔使兩個月，竟然急急腳行使同減持到5%以下，以後走咗都冇人知，確係耐人尋味。但係我更有興趣係，大戶幾時都係有同管理層「通靈」嘅秘技，我哋呢班小股民有排都跟唔上啦！