牛熊對壘：睇好中交建買29398

美國企業業績支持道指回穩，港股幾近平開之後，走勢窄幅牛皮，收市升15點，終止了三連跌，惟上升乏力，下周一期指結算，後市難捉，做好做淡都不宜瞓身。

恒指昨日低位18,793點，高過前日低位的18,710點，擺明淡友無再殺落，收回的8隻恒指牛都是未出生已陣亡的BB牛，無關現有街貨。前日恒指牛證及Call輪好倉，再有3,160萬元資金流入，計埋過去三個交易日流入資金達1.4億元，同期三日淡倉流出7,901萬元，散戶繼續傾向博反彈。

人行又進行逆回購增加流動性，再有長沙市政府發布重大項目投資，總額達八千多億元人仔，今日要炒上的可能性提高。雖然筆者一向認為經濟起跌有周期，就算美國推QE3，都不是靈丹妙藥，不過內地情況特殊，市場開放程度有限，若重藥放在基建投資，效應可以立竿見影，只是如此失衡地一味依賴基建撐經濟，興奮過後要面對長線發展的窒礙，壞處亦不少。

身邊的口痕友經過一周的沉思，大方向依然睇淡，現時不停話股份好抵買的一班專家，豈不是全部睇錯？其實，有財力唔怕坐貨，只要買入的股份唔爆煲，無拉閘，頂多是買貴咗。

中長期Call輪值博

睇唔通後市，又唔想錯過反彈機會，不妨諗一諗中長期Call輪。雖然窩輪的內在值較高，但現時個股輪的引伸波幅唔算太貴，滙控（00005）多於三個月期的平均引伸波幅28.5，中移（00941）只有23.5，若大市趨波動，引伸波幅還有擴大的機會。相比正股，輪價始終平一截兼具槓桿作用。

當然，可long可short的期權更有留意價值，只是該市場玩家專業，當對手的技術及資訊都比你高的時候，落場贏面自然大減。

內地鐵路股近來強勢，中交建（01800）本周步入調整期，但相關鐵路政策趨向加快速度，方向有利，可趁機追入中線Call。中交滙豐購（29398）明年十二月三十一日到期，行使價6.88元，實際槓桿3.2倍。