股海實戰：體育用品股不宜沾手

期指結算在即，恒指幾十點上落，方向未明，反而個別股份有睇頭。好似中資電訊股聯通（00762）及中移（00941）繼續偏強；前晚油價回穩，兩大石油股靠穩。今日係周末前交易日，宜採炒股不炒市策略，待下周期指結算及美國聯儲局會議有結果，後市才會漸趨明朗。

前日見到北京市市長辭職嘅消息，仲以為係因為水災下台，原來純屬換屆人事安排，因月初市長已獲升任為市委書記。講到北京，北控集團已成為中國燃氣（00384）嘅大股東，外界已有心理準備新奧能源（02688）嘅提購成功機會不高，但做生意都係求財，討價還價繼續，會否締造三贏局面，不妨等着瞧。

回說尋日市況，阿莊組合最近買入嘅中國人壽（02628），尋日曾反彈上21.25元，見多日未能重上10日線，故以均價21.05元沽出一萬股，後來見到滬綜指穿底，睇怕止蝕行動冇錯，會留意低位承接再作部署。此外，尋日上晝傳來中投沽貨疑雲，其中旭光（00067）雖澄清中投只持其CB而未有作任何減持，股價仍要跌7%，反映人心虛怯，一有負面消息就鬥快跳車。

是非纏身廣藥捱沽

早前嘅強勢股廣藥（00874），股價見歷史新高19.66元後反覆回落，尋日單日挫8.37%，收報13.58元，成交達2.1億元。聽聞有內地律師質疑廣藥集團喺發放「王老吉」商標利好公告前涉嫌內幕交易，如今未知事態發展，唔排除係大戶見到隻股可能有是非纏身，索性沽貨離場。

倫敦奧運今晚開幕，此前體育用品股有異動，其中安踏（02020）、李寧（02331）、匹克（01968）均升1%。缸邊友稱體育用品股為「殭屍股」，皆因近年股價大跌攞命，如今喺低位「彈跳」力度疲乏兼缺乏成交支持，好似殭屍咁面無血色！阿莊喺度諗，嚟緊魚缸會唔會有更多股份加入「殭屍股」行列？

事實上，喺歐債危機陰霾濃罩下，單單一個奧運會對刺激經濟嘅作用恐怕短暫而有限，更何況內地體育用品市場正處於清理存貨及大幅削減銷售點嘅階段，行業由過度擴張到依家要大刀闊斧收縮整理，過程肯定痛苦。再睇第三季至今內地經濟增長未見大起色，消費意欲轉弱，唔排除會進一步拖慢體育用品行業嘅調整期。故從消息面睇，短期體育用品股仍未能擺脫弱勢，任何「彈跳」只宜視為落車機會，冇貨喺手，最好眼看手勿動！