樓市出更：吉祥收購閃電過九成

鰂魚涌吉祥大廈相信係近年港島東區最大型私人收購項目，財團喺今年初先後將項目分拆成10個申請入稟強拍，翻查土地註冊處資料，事隔逾半年，個財團已成功增購單位，涉及單位多逾10個，相信財團有機會已取得物業超過九成業權份數。依家幢大廈唔少地舖租戶已陸續因滿約而遷出，收購範圍內大部分商舖亦已「拉閘」，僅剩低約10家商戶仍然「開門」營業。

起好超過半個世紀嘅吉祥大廈，範圍好大，橫跨英皇道、七姊妹道、健康東街及禮信街共四條街，仲要係三面單邊地盤。劉Sir日前親自到現場睇過，現時幢大廈地舖商戶大部分已遷出，部分原有商戶亦已響附近嘅健康邨或中原大廈重新營業。

業主套錢走 租戶嘆無奈

其中會喺今個月底「拉閘」唔做嘅茶餐廳老闆娘張太同劉Sir呻：「覺得好無奈，自從吉祥大廈有聲氣收購，七姊妹道嘅商舖業主就每兩年咁簽租約，唔似得前面英皇道舖位，可以一簽就五年。」佢仲話，聽講財團出價每個千五萬收購附近幾個地舖，好多業主都攞錢走，而自己經營嘅餐廳因為租約期滿，業主唔續租，惟有「執咗佢」。至於未搬嘅商戶，啲客仔以為大廈就拆唔嚟幫襯，好似英皇道一間麵包舖，門外就貼有一張「我們未搬」嘅告示。

幢大廈近英皇道同禮信街一段，依家搭緊棚，令劉Sir聯想項目係咪準備重建，不過仍然開門做生意嘅英皇道茶餐廳東主同劉Sir講：「未有咁快拆樓，我諗都要等多兩、三年，係政府要業主翻新，每日都見到工人搬十幾包建築材料上樓，其實過幾年都拆，唔明白點解仲要咁浪費資源，應該要去環保團體投訴吓。」

財團申強拍 再添十成交

吉祥大廈自今年一月中開始有財團入稟土地審裁處申請強拍，前前後後分拆成10宗個案入稟，而申請強拍之後，吉祥大廈呢半年仍有成交登記，夾埋有成10宗成交。

其中一個英皇道地舖，今年三月以約莫一千九百萬賣咗，原業主揸咗超過十八年升值近三倍，帳面賺成一千四百幾萬。至於住宅單位，成交個案由二百七十幾到超過五百九十萬。