期指攻略：結算在即 離場觀望

颱風過後市面一片狼藉，魚缸亦唔好得去邊，恒指昨日低開141點，午後曾一度倒升，但為時短暫，結果收市報18,877點，跌25點，主板成交447億元。執筆時見到外圍市況終於回穩，華爾街日報話聯儲局出手的日子已愈來愈近。之不過，筆者始終認為，QE3並非大家想像般如此具威力，相信伯老亦心知肚明，會選擇在美國總統大選前拖得就拖，唔到最差的時候都唔會出手。

昨日恒指現貨高低波幅215點，中資電訊股做好及滙控（00005）反彈。期指收市報18,850點，低水27點，成交張數增至94,367張，而下月期指收報18,800點，低水77點。

筆者前日以三分之一資金小注追沽，話睇番六月初至七月初升浪的調整幅度0.618倍之18,636點，見尋日低位落到18,649點便止步，加上投資者正觀望本周末前人行可能下調存備率，故選擇先行平倉食胡。技術上，恒指昨日一度跌穿頸線支持位18,850點，低見18,710點，但收市又重返其上，而現貨成交依然不足，故尚未能確定後市方向。考慮到七月份期指結算在即，今日做好做淡都賭唔過，建議暫時忍忍手，等下周初結算後再作部署。