Fundman睇市：家電股無謂博反彈

港股頭肩頂頸線18,850點確認失守，但低成交下，一個唔該，大孖沙趁大部分人恐慌時去貪婪，恒指由早市跌最多192點，到收市跌幅收窄到25點，報18,877點。

市場繼續充斥壞消息，穆迪將德國及歐洲金融穩定機制（EFSF）的評級展望降至負面；西班牙五年期違約風險溢價（CDS）再創新高，去到649點；國基會（IMF）報告雖認為中國經濟正在軟着陸，但依然面對顯著下行風險；而季度業績「慣常」優於預期的蘋果公司，四至六月份季度業績「撻Q」，iPhone 4S銷售遜預期。但逆向去想，或者可以催促新iPhone 5面世，為年底份季度業績救亡，屆時一眾果粉又有新玩具矣。

蘋果等iPhone 5打救

其實未睇研究報告，單係企響中環地鐵站等地點目測，三星Galaxy確實搶走蘋果唔少生意，而Google四至六月提及「Apple iPhone 4S」的網站2,200萬個，不到「Samsung Galaxy」3,800萬個的三分之二，在搶眼球的點數上蘋果輸晒，睇嚟真係有必要解決傳聞零部件供應樽頸，以縮短產品周期。

尋日，台灣相關股份在蘋果份業績後跌到一仆一碌，本地嘅瑞聲（02018）亦一度跌9%，直情洗倉一樣。巴克萊話業績後，相關股份調整反而提供機會，可以增持iPhone 5供應鏈中各類股票，而且iPhone 4S銷售放緩，意味緊接的iPhone 5將相當熱爆，可留意台灣的鴻海、大立、臻鼎及香港的瑞聲。

盈警浪接浪，首季業績大跌88%的國美（00493），預告半年業績見紅，股價一度見八年低位的0.62元。基金失望，源於競爭對手蘇寧早前盈警估半年業績倒退兩至三成，國美對比下情況未許樂觀。分析員會議上，國美將問題歸咎於一、二線城市店舖銷售受經濟影響明顯放緩、電子商務業務虧損、以及白家電促銷使毛利率受壓所致，但就無提第二季同店銷售，會唔會跟第一季的34.4%跌幅相若。

今日唔少內地朋友都鍾意到淘寶「濕平」，不禁令人想到，到底傳統家電零售商，是否應積極發展電子商貿及網上銷售？尤其家電屬於高度標準化的產品，同一品牌，同一產品，理論上北京或者深圳買的，是一模一樣，顧客群一旦習慣通過網絡去貨比三家，傳統零售商功能變成陳列室，消費者看過摸過，格價後好可能選擇營運成本低的網店購貨（正是淘寶近年冒起的最大優勢）。

今日國美拓展電子商貿同時縮減門市，感覺有點兩頭唔到岸，近年一直巨額開店的投資隨時泡湯，亦唔似得低成本，不作庫存的網店，可以輕身上路。或許短期同店銷售出現單位數反彈，可令股價收復部分失地，但經驗告訴我們，這類營銷策略調整過程，風險唔細，博反彈只限於技術高超之士。