股海實戰：聯想撈貨等5元樓下

歐債危機燒到德國，如今大家都在等候最壞時刻來臨，因為只有見到信心將近崩潰，先至能夠凸顯到各國再聯手出招大規模救市嘅效用。回說尋日港股市況，低開過後曾倒升，可惜曇花一現，缸邊友見彈唔起已無心戀戰，結果恒指低收25點，報18,877點。

呢期弱勢股之最嘅國美電器（00493）再響警鐘，股價急插近15%。不斷聽到股民問：咁大個內地零售品牌同全國性銷售網絡，係咪真係咁唔值錢？睇牌面呢個局面確實令人迷茫，但會唔會係有啲負面因素小股民未掌握？反正睇唔通，做旁觀者最自保。

電訊股成避風港

今年以來聽到唔少喺香港炒樓嘅老友話轉去炒英國樓。其實唔只地產，連公用業務都吸引外資目光，就如尋日停牌嘅長建（01038），便組合營收購英國天然氣項目。呢類收購短期未必會見到太大效益，但長遠具策略意義。

尋日提到嘅電訊股果然有異動，聯通（00762）及中電信（00728）均升逾半成，中移（00941）則逆市靠穩，唔見得板塊有特別利好消息，相信純粹係魚缸風大雨大，避險需求增加所造成，炒相關衍生工具者，宜密切留意市況轉向。

據IDC初步數據顯示，今年次季度聯想（00992）創下有史以來嘅最高市場佔率，達14.9%。資料顯示其首季市佔率約13.1%，正向行業首位步步進逼。不過尋日其股價不升反跌3.5%，弱勢未改。打從上月其股價受負面傳聞影響而急挫後，反彈一浪低於一浪，相信同基金大戶睇淡下半年內地電子消費品市場銷售前景有關。

究竟內地經濟增長放緩會持續多久，季內能否見底回升，阿莊亦冇水晶球，但以聯想股價自次季高點7.7元回落至尋日低位5.36元，累跌幅度已達三成而言，相信某程度已反映不明朗因素。考慮到身處大淡市，即使覺得心儀股份已到抵買嘅價錢，最好都係忍忍手再打個折。睇圖表，○九年以來嘅上升通道支持喺4.8至5元區域，相信落到該水平，母公司出手增持嘅機會亦較大。