樓市出更：名店街轉靜吉舖無人吼

內地豪客來港消費已無咁「猖狂」，本港高檔消費品前景唔好話無隱憂，零售商搶租一線街舖步伐都急煞車，月租倍增嘅預租個案減少外，部分名店街更罕現長期吉舖；劉Sir收到風，尖沙咀栢麗購物大道一個地舖連1樓，前租戶遷出已約三個月，業主就算多次調低意向租金共約25%，至今都未租得出。

劉Sir發現近排銅鑼灣、尖沙咀、中環及旺角多條一線街街舖，搶租同預租情況都比首季差咗，個別仲罕現長期吉舖，無人問津。好似舊年頻錄大手預租個案嘅尖沙咀栢麗購物大道，隨着大型商戶對後市轉審慎，近期一個地舖連1樓丟空約三個月都租唔出。

呢間舖面積共約2,600方呎，前租客係鐘錶及金飾店，六年前開始租用，對上一次租約市值月租120萬元，約三個月前遷出後，業主未能物色新租客，更多次調低意向租金，由月前嘅約240萬元，減約25%至現時約180萬元。

旺角銅鑼灣減租兩成

而旺角西洋菜南街亦罕有出現幾間吉舖待租多個月情況，好似一個面積約千呎雙號舖，前租戶精品店遷出約兩個月，最新意向月租亦減約20%至約40萬元。

至於國際高檔品牌喜歡搶攻嘅銅鑼灣一線地舖，搶租情況都轉靜，好似波斯富街一個雙號地舖原由食肆以約20萬元租用，約四個月前遷出後，最新意向月租減兩成至40萬元。

之前劉Sir同資深投資者湯君明斟開，部分一線地舖租金見頂，環球經濟不穩，近年本港高檔零售支柱靠晒班內地豪客，情況令人擔憂，所以認為呢啲高昂地舖叫租要調低約10至15%先吸引到租戶承租意欲。

東九甲廈呎租快見頂

其實寫字樓情況都唔樂觀，尤其近年租金升得快嘅東九龍，高力國際麥健偉話，觀塘同九龍灣唔少甲級寫字樓呎租過晒30元，下半年呎租有機會見頂，所以有啲喺區內仲享受緊呎租十幾元嘅租客擔心續租租金倍增，計劃轉租長沙灣等租金平啲嘅寫字樓，估計西九龍寫字樓今年租金有5至7%升幅。