魚缸Blogger：中芯突破橫行局面
上周末人行未有減RRR，加上歐債危機又再惡化，歐、美魚缸風聲鶴唳，港股尋日亦難免一跌，恒指一個唔該又要放低五舊幾，睇嚟支持位要退守18,800點，缸邊友要緊握扶手！
能逆市上升嘅股份唔多，其中一隻居然係長期弱勢股中芯國際（00981），皆因公司上調次季營收增長預測，由原先嘅19至21%上調到25至26%，同時將毛利率指引由原先嘅19至22%上調到23至24%。雖然上調幅度唔係好多，但依然炒得起，顯示炒家真係苦無對象，見有消息配合博大霧炒一轉。技術上，股價初步突破為時個多月嘅橫行局面，大陽燭升穿保力加通道頂部，守穩0.27元樓上，有勢向0.295元推進。
中芯國際（00981）
阻力位：0.295元
支持位：0.246元