市場徐想：雷士殘局有待收拾
呢期如果要數最多人關注嘅老總，雷士照明（02222）前老總吳長江當之無愧。如果各位粉絲唔善忘，吳生之前因畀人話賭錢輸身家，被迫斬倉同填孖展，將佢嘅大股東地位送咗畀另外一個基金股東，然後，由基金股東選出一名「有能賢士」頂住。誰不知一波未平一波又起，新老總上場，一班員工同分銷商竟然「行動一致」地罷工同唔做嘢，要求吳老總重新歸位執掌江山。Prof. J見到，真係淚流滿面，皆因中國人的「情與義，值千金」確係無得頂。
但原來內地傳媒話有超過300個雷士員工加分銷商，一早靠吳生幫手買雷士股票，死硬派粉絲自然全力護航。面對來自員工同分銷商嘅「兵變行動」，股東基金都變咗紙板公仔，完全語唔到事。假設兩間基金公司忍痛離場，問題係吳生有冇水可以再接貨？要其他基金公司接，你估人哋係傻咩，容乜易入咗之後又變咗另一個話唔到事嘅紙板公仔？